જેતપુરના ઉદ્યોગોમાંથી નીકળતો કેમિકલયુક્ત કચરો અને દૂષિત પાણી પોરબંદરના દરિયામાં ઠાલવવા માટે આ પાઈપલાઈન નાખવાનું આયોજન?
(જી.એન.એસ) તા. ૧૧
પોરબંદર,
છેલ્લા ઘણા દિવસોથી જેતપુર ડીપ સી પાઈપલાઈન પ્રોજેક્ટને લઈને સ્થાનિકો, માછીમાર અને વિવિધ સંગઠનોમાં ભારે રોષ જોવા મળી રહ્યો છે કારણ કે તેમનું કહેવું છે કે, જેતપુરના ઉદ્યોગોમાંથી નીકળતું દૂષિત પાણી, કચરો પોરબંદરના દરિયામાં ઠાલવવા માટે આ પાઈપલાઈન નાખવાનું આયોજન કરવામાં આવી રહ્યું છે. આ પ્રોજેક્ટથી દરિયાઈ જીવસૃષ્ટિ અને પર્યાવરણને મોટા પાયે નુકસાન થવાની ભીતિ સેવાઈ રહી છે, જેને કારણે સમગ્ર પોરબંદર જિલ્લામાં તેનો સખત વિરોધ થઈ રહ્યો છે.
હમણાજપોરબંદર ખાતે માછીમાર બોટ એસોસિએશન ખાતે જેતપુર ડીપ સી પાઈપલાઈન પ્રોજેક્ટના કોન્ટ્રાક્ટરો અને ‘મેઘા કંપની’ના પ્રતિનિધિઓ દ્વારા એક ખાસ બેઠકનું આયોજન કરવામાં આવ્યું હતું. આ બેઠકનો મુખ્ય હેતુ પ્રોજેક્ટની કામગીરી અને આયોજન અંગે માછીમાર આગેવાનોને સમજાવવાનો હતો. જોકે, સ્થાનિક સંસ્થાઓ અને માછીમાર સમુદાયે કંપનીના આ પ્રસ્તાવને સ્પષ્ટપણે ફગાવી દીધો હતો.
બેઠકમાં હાજર રહેલા પોરબંદરના માછીમાર આગેવાનો, ‘સેવ પોરબંદર સી’ અભિયાનના કાર્યકરો અને વિવિધ સામાજિક સંસ્થાઓએ એકસૂરે સ્પષ્ટ ચીમકી આપી છે. તેમણે જણાવ્યું છે કે, “અમે પોરબંદર જિલ્લાની સીમામાં આ પાઈપલાઈન કોઈ પણ ભોગે નહીં નાખવા દઈએ.” આગેવાનોએ વધુમાં ઉમેર્યું કે, જો શાસન કે કંપની દ્વારા પ્રોજેક્ટને જબરદસ્તી આગળ વધારવાનો પ્રયાસ કરવામાં આવશે, તો પોરબંદરના ઈતિહાસનું સૌથી મોટું અને ઉગ્ર આંદોલન કરવામાં આવશે.
મહત્વનું છે કે, આ વિરોધ પ્રદર્શનમાં માત્ર માછીમારો જ નહીં, પરંતુ સ્થાનિક ખેડૂતો પણ જોડાયા છે. ખેડૂતોએ પણ આ પાઈપલાઈન પ્રોજેક્ટ સામે પોતાનો ભારે વિરોધ નોંધાવ્યો છે. જમીન અને દરિયાઈ પર્યાવરણ બંનેને આ પ્રદૂષણથી મોટું નુકસાન થવાની ભીતિ હોવાથી ખેડૂત સમાજે પણ માછીમારો અને સ્થાનિક સંગઠનોના આ આંદોલનને સંપૂર્ણ સમર્થન આપવાની જાહેરાત કરી છે.