AIIMS જેવી અગ્રણી સંસ્થાઓ માટે પોસાય તેવી, સરળતાથી ઉપલબ્ધ અને સસ્તી આરોગ્ય સંભાળ સેવાઓનો વિકાસ કરવો એ એક અવસર પ્રદાન કરે છે: રાષ્ટ્રપતિ દ્રૌપદી મુર્મૂ
(જી.એન.એસ) તા. ૬
બિલાસ્પુર,
ભારતના રાષ્ટ્રપતિ શ્રીમતી દ્રૌપદી મુર્મૂએ હિમાચલ પ્રદેશના બિલાસપુર ખાતે AIIMS બિલાસપુરના પ્રથમ પદવીદાન સમારોહની શોભા વધારી હતી.
આ પ્રસંગે પોતાના સંબોધનમાં રાષ્ટ્રપતિએ જણાવ્યું હતું કે તબીબી વ્યવસાયનો પ્રાથમિક ઉદ્દેશ્ય માનવતાની સેવા કરવાનો હોવો જોઈએ. તેમણે રેખાંકિત કર્યું હતું કે ડોક્ટર પાસે આવતી બીમાર વ્યક્તિ પોતાની બીમારી સંબંધિત ડર અને અનિશ્ચિતતા જ નથી લાવતી, પરંતુ આશા પણ લઈને આવે છે. તેમણે ભારપૂર્વક જણાવ્યું કે ડોક્ટરોની સહાનુભૂતિ અને કરુણાપૂર્ણ વ્યવહાર દર્દીને સારવાર આપતા તેમના જ્ઞાન અને કૌશલ્ય ઉપરાંત દર્દીને હિંમત આપે છે. તેમણે ડોક્ટરોને પોતાના વ્યવસાયમાં ઉત્કૃષ્ટતા પ્રાપ્ત કરવાની સાથે સંવેદનશીલતા અને કરુણા અપનાવવા વિનંતી કરી હતી.
રાષ્ટ્રપતિએ જણાવ્યું હતું કે ન્યૂનતમ દરે ગુણવત્તાયુક્ત તબીબી સંભાળ એ AIIMS ની વિશેષતા છે. તેમણે કહ્યું કે દેશના લોકો માટે AIIMS નો અર્થ દેશના સૌથી સક્ષમ ડોક્ટરો દ્વારા તબીબી સારવાર છે. તેમણે ઉમેર્યું કે દેશના વિવિધ ભાગોમાં આ વિશ્વાસનો લાભ વધુ સંખ્યામાં લોકો મેળવી શકે અને વધુ તેજસ્વી વિદ્યાર્થીઓ ઉચ્ચ કક્ષાનું તબીબી શિક્ષણ મેળવીને દેશની સેવા કરી શકે તેવા ઉદ્દેશ્યો સાથે ઘણી AIIMS ની સ્થાપના કરવામાં આવી છે.
રાષ્ટ્રપતિએ જણાવ્યું હતું કે AIIMS બિલાસપુર તેના ભૌગોલિક સ્થાનને કારણે ખાસ જવાબદારી ધરાવે છે. હિમાચલ પ્રદેશના અંતરિયાળ વિસ્તારોમાં રહેતી વસતી સુધી સમયસર ગુણવત્તાયુક્ત આરોગ્ય સંભાળ સેવાઓ પહોંચાડવી એ એક બહુઆયામી પડકાર છે. તેમણે કહ્યું કે AIIMS બિલાસપૂરે અદ્યતન તૃતીય કક્ષાની આરોગ્ય સંભાળ માટેના અગ્રણી કેન્દ્ર તરીકે ઉભરી આવવું જોઈએ. તેમણે ટેલિમેડિસિન, અંતરિયાળ વિસ્તારો માટે નિષ્ણાત પરામર્શ, તબીબી સ્ટાફની તાલીમ અને આધુનિક ટેકનોલોજીના ઉપયોગ દ્વારા પહાડી વિસ્તારોમાં આરોગ્ય સંભાળ સેવાઓને મજબૂત કરવાની જરૂરિયાત પર ભાર મૂક્યો હતો.
રાષ્ટ્રપતિએ જણાવ્યું હતું કે સામાન્ય લોકો માટે ગંભીર બીમારીની તબીબી સારવારનો ખર્ચ ઉઠાવવો એ ભારે આર્થિક બોજ સમાન છે. સમાજના વંચિત અને નબળા વર્ગો દ્વારા સામનો કરવામાં આવતી આ મુશ્કેલીને દૂર કરવા માટે, ભારત સરકાર ‘આયુષ્માન ભારત-પ્રધાનમંત્રી જન આરોગ્ય યોજના’ હેઠળ પરિવાર દીઠ વાર્ષિક રૂ. 5 લાખ સુધીનું આરોગ્ય વીમા કવચ પૂરું પાડે છે.
રાષ્ટ્રપતિએ કહ્યું કે નાગરિકોને પોસાય તેવા ખર્ચે ગુણવત્તાયુક્ત આરોગ્ય સંભાળ પૂરી પાડવી એ આપણી સામૂહિક જવાબદારી છે. તબીબી સાધનો અને દવાઓની વધતી કિંમતો દર્દીઓ અને તેમના પરિવારો માટે ગંભીર પડકાર ઉભો કરે છે. પોસાય તેવી, સરળતાથી ઉપલબ્ધ અને સસ્તી આરોગ્ય સંભાળ સેવાઓનો વિકાસ કરવો એ AIIMS જેવી અગ્રણી સંસ્થાઓ માટે એક પડકાર અને અવસર બંને પ્રદાન કરે છે. આવા પ્રયાસો દ્વારા આપણા નાગરિકો સ્વસ્થ રહેશે અને પોતાની પૂર્ણ ક્ષમતા સાથે દેશની પ્રગતિમાં યોગદાન આપી શકશે.