(જી.એન.એસ) તા. ૨૨
ઇન્ટરનેશનલ ક્રિકેટ કાઉન્સિલ (ICC) દ્વારા 2028 લોસ એન્જલસ ઓલિમ્પિક્સમાં મહિલા ક્રિકેટ ટુર્નામેન્ટ માટેની ક્વોલિફિકેશન પ્રક્રિયામાં ફેરફાર કર્યો છે. જો યુનાઇટેડ સ્ટેટ્સ (USA) યજમાન તરીકેની પાત્રતાની શરતો પૂરી કરવામાં નિષ્ફળ જાય, તો ફેબ્રુઆરી 2027માં યોજાનારી પ્રથમ ‘વુમન્સ ચેમ્પિયન્સ ટ્રોફી’ ના પરિણામોના આધારે એક વધારાનું સ્થાન આપવામાં આવશે.
ઓક્ટોબરમાં દુબઈમાં યોજાયેલી બેઠકો બાદ, સભ્ય દેશોના ક્રિકેટ બોર્ડને આ સુધારેલા માપદંડો વિશે જાણ કરવામાં આવી હતી. આ સાથે 2027 અને 2031ના ODI વર્લ્ડ કપ વચ્ચે યોજાનારી આંતરરાષ્ટ્રીય ટુર્નામેન્ટોનું સમયપત્રક પણ જાહેર કરવામાં આવ્યું છે. આ કેલેન્ડરમાં પુરુષોની 12 ઇવેન્ટ્સ, મહિલાઓની 7 સ્પર્ધાઓ અને અંડર-19ની 5 ટુર્નામેન્ટો (ક્વોલિફાઇંગ ઇવેન્ટ્સ સહિત) નો સમાવેશ થાય છે.
સુધારેલી વ્યવસ્થા હેઠળ, USAની મહિલા ટીમે યજમાન તરીકે સીધો પ્રવેશ મેળવવા માટે 31 ડિસેમ્બર, 2026 સુધીમાં ICCની રેન્કિંગની શરતો પૂરી કરવી પડશે. જો તેઓ આ શરતો પૂરી કરવામાં નિષ્ફળ જાય, તો વધારાની ક્વોલિફિકેશન જગ્યા T20I રેન્કિંગને બદલે ‘વુમન્સ ચેમ્પિયન્સ ટ્રોફી’ના સ્ટેન્ડિંગ (ક્રમાંક) ના આધારે નક્કી કરવામાં આવશે.
‘ક્રિકઇન્ફો’ ના અહેવાલ મુજબ, ઓક્ટોબરમાં સભ્ય દેશોને મોકલેલા સંદેશમાં ICCએ જણાવ્યું હતું કે, “જો યજમાન (USA) 31 ડિસેમ્બર, 2026 સુધીમાં રેન્કિંગના માપદંડો પૂરા ન કરે, તો તે જગ્યા ‘ICC વુમન્સ ચેમ્પિયન્સ ટ્રોફી 2027’ના સ્ટેન્ડિંગ (કટ-ઓફ તારીખ: 1 માર્ચ, 2027) ના આધારે ફરીથી ફાળવવામાં આવશે.”
USAની પુરુષ ટીમે પ્રવેશ મેળવી લીધો છે
અમેરિકાની પુરુષ ટીમે, જે હાલમાં T20I રેન્કિંગમાં 13મા સ્થાને છે, તેણે વર્તમાન નિયમો હેઠળ ઓલિમ્પિકમાં સીધો પ્રવેશ મેળવી લીધો છે. જ્યારે 19મા ક્રમે રહેલી મહિલા ટીમની ભાગીદારી અંગે હજુ અનિશ્ચિતતા છે. નોંધનીય છે કે, યજમાન તરીકેની રેન્કિંગની શરતો પૂરી કરવા માટેનો સમયગાળો 30 જૂનથી 31 ડિસેમ્બર, 2026 સુધીનો છે.
આ વર્ષની શરૂઆતમાં યોજાયેલા T20 વર્લ્ડ કપ બાદ, ઓસ્ટ્રેલિયા, ભારત, દક્ષિણ આફ્રિકા અને ગ્રેટ બ્રિટને પોતપોતાના ખંડમાંથી સર્વોચ્ચ રેન્કિંગ ધરાવતી પાત્ર ટીમો તરીકે ઓલિમ્પિકમાં મહિલા ક્રિકેટ માટે પોતાનું સ્થાન નિશ્ચિત કરી લીધું છે. પુરુષોની સ્પર્ધામાં, ખંડીય પ્રતિનિધિત્વ ૩૧ ડિસેમ્બર, ૨૦૨૬ સુધીના T20I રેન્કિંગના આધારે નક્કી કરવામાં આવશે.
દરમિયાન, ઓલિમ્પિક ક્વોલિફાઇંગ ટુર્નામેન્ટ્સને ૨૦૨૭થી ખસેડીને જાન્યુઆરી અને ફેબ્રુઆરી ૨૦૨૮માં યોજવાનો નિર્ણય લેવાયો છે. દરેક ટુર્નામેન્ટમાં આઠ ટીમો ભાગ લેશે, જેમાં સીધી ક્વોલિફાય થનારી ટીમો સિવાયના સર્વોચ્ચ રેન્કિંગ ધરાવતા સાત પાત્ર દેશો અને કેરેબિયન પ્રાદેશિક ક્વોલિફાયરના વિજેતાનો સમાવેશ થશે. હાલની સ્થિતિ મુજબ, આ ટુર્નામેન્ટ્સ ક્યાં યોજાશે તે હજુ નક્કી થયું નથી.
૨૦૨૮ T20 વર્લ્ડ કપનો સમયગાળો
ICCએ ૨૦૨૮માં યોજાનારા T20 વર્લ્ડ કપ માટેનો સમયગાળો પણ નક્કી કરી દીધો છે. પાકિસ્તાનમાં ૧૨ ટીમોની મહિલા ટુર્નામેન્ટ ૭ સપ્ટેમ્બરથી ૧ ઓક્ટોબર સુધી ચાલશે, ત્યારબાદ ઓસ્ટ્રેલિયા અને ન્યુઝીલેન્ડમાં પુરુષોની ૨૦ ટીમોની સ્પર્ધા ૧૨ ઓક્ટોબરથી ૧૨ નવેમ્બર દરમિયાન યોજાશે.
આ ઉપરાંત, ૨૦૨૯ વર્લ્ડ ટેસ્ટ ચેમ્પિયનશિપની ફાઈનલ ઈંગ્લેન્ડમાં ૮ થી ૧૨ જૂન દરમિયાન યોજાનાર છે. ઈંગ્લેન્ડ, આયર્લેન્ડ અને સ્કોટલેન્ડને સોંપવામાં આવેલો ૨૦૩૦નો પુરુષ T20 વર્લ્ડ કપ, જે મૂળભૂત રીતે જૂન મહિનામાં યોજવાનું આયોજન હતું, તેને હવે જુલાઈ-ઓગસ્ટ મહિનામાં ખસેડવામાં આવ્યો છે.