ભારતના રાષ્ટ્રપતિએ બસ્તર દશેરા નિમિત્તે છત્તીસગઢના જગદલપુર ખાતે જાહેર કાર્યક્રમની શોભા વધારી

આપણે આદિવાસી સમાજની પ્રકૃતિ-પોષક જીવનશૈલીમાંથી મૂલ્યવાન પાઠ શીખીએ: રાષ્ટ્રપતિ દ્રૌપદી મુર્મૂ

(જી.એન.એસ) તા. ૨૩

જગદલપુર,

ભારતના રાષ્ટ્રપતિ શ્રીમતી દ્રૌપદી મુર્મૂએ બસ્તર દશેરા નિમિત્તે છત્તીસગઢના જગદલપુર ખાતે આયોજિત જાહેર કાર્યક્રમની શોભા વધારી હતી અને સંબોધન કર્યું હતું.

આ પ્રસંગે સંબોધન કરતા રાષ્ટ્રપતિએ જણાવ્યું હતું કે, બસ્તર દશેરા છત્તીસગઢના સાંસ્કૃતિક ગૌરવ અને સામૂહિક આસ્થાનું એક જીવંત પ્રતીક છે. બસ્તર દશેરા ઉત્સવમાં સમગ્ર સમાજ જે રીતે ભાગ લે છે તે ખરેખર અસાધારણ છે. આ ઉત્સવના વિવિધ ધાર્મિક વિધિઓ અને રીત-રિવાજો સમાજના વિવિધ વર્ગો વચ્ચે જોડાણ અને આત્મીયતાની ઊંડી લાગણી જગાડે છે.

રાષ્ટ્રપતિએ કહ્યું કે છત્તીસગઢે લાંબા સમયથી નક્સલવાદનો ડંખ સહન કર્યો છે. કેન્દ્ર અને રાજ્ય સરકારોના સંકલિત પ્રયાસો દ્વારા, આ પ્રદેશ નક્સલી હિંસાના દૂષણમાંથી મુક્ત થયો છે અને હવે પ્રગતિના પંથે ઝડપથી આગળ વધી રહ્યો છે. તેમણે એ નોંધતા આનંદ વ્યક્ત કર્યો હતો કે તાજેતરના સમયમાં આદિવાસી સાહસિકોને નાણાકીય સહાય પૂરી પાડવાની અને તેમને બજારો સાથે જોડવાની પહેલોને વધુ ઝડપી બનાવવામાં આવી છે. તેમણે વિશ્વાસ વ્યક્ત કર્યો હતો કે આ પ્રયાસો ન્યાયી અને સમાવેશી વિકાસ દ્વારા 2047 સુધીમાં ‘વિકસિત ભારત’ના લક્ષ્યને પ્રાપ્ત કરવામાં મહત્વપૂર્ણ સાબિત થશે.

રાષ્ટ્રપતિએ ઉમેર્યું હતું કે આદિવાસી સમાજ પ્રકૃતિની પૂજા કરે છે જે જીવનદાત્રી છે. વિકાસની યાત્રામાં આપણે આદિવાસી સમાજની પ્રકૃતિ-પોષક જીવનશૈલીમાંથી મૂલ્યવાન પાઠ શીખવા જોઈએ. તેમણે પ્રકૃતિના જતન અને સંવર્ધનના મહત્વ પર ભાર મૂક્યો હતો.

જાહેર કાર્યક્રમ પહેલા રાષ્ટ્રપતિએ મુરિયા દરબારમાં સ્થાનિક માંઝી અને ચાલકી સાથે વાર્તાલાપ કર્યો હતો. તેમણે જગદલપુરમાં રંગોળી અને દશેરા પ્રદર્શનની પણ મુલાકાત લીધી હતી.

અગાઉ, રાષ્ટ્રપતિએ જગદલપુરમાં મા દંતેશ્વરી મંદિરમાં દર્શન અને પૂજા અર્ચના કરી હતી.