(જી.એન.એસ) તા. ૨
ગાંધીનગર/અમદાવાદ,
29 સભ્યોની ભારતીય પેરા આર્ચરી ટુકડી 5-9 સપ્ટેમ્બર, 2026 દરમિયાન સાબરમતી રિવરફ્રન્ટ (અમદાવાદમાં) ખાતે યોજાનારી આગામી અમદાવાદ 2026 હ્યુન્ડાઈ વર્લ્ડ આર્ચરી પેરા સિરીઝમાં ભાગ લેવા માટે સંપૂર્ણપણે સજ્જ છે.
તેમની તૈયારીઓના ભાગરૂપે, આ ટુકડીએ 23 ઓગસ્ટ થી 2 સપ્ટેમ્બર, 2026 દરમિયાન સ્પોર્ટ્સ ઓથોરિટી ઓફ ઇન્ડિયા (SAI) ના નેશનલ સેન્ટર ઓફ એક્સેલન્સ (NCoE), ગાંધીનગર ખાતે તાલીમ શિબિરમાં ભાગ લીધો હતો.
આ પ્રથમ વખત બનશે જ્યારે ભારત વર્લ્ડ આર્ચરી પેરા સિરીઝનું આયોજન કરશે. આ ટુર્નામેન્ટમાં ચીન, કોરિયા, ઈરાન, ફ્રાન્સ, જર્મની, યુએસએ અને કેનેડા સહિત કુલ 20 દેશો ભાગ લેશે.
વર્લ્ડ આર્ચરી પેરા સિરીઝ સ્ટેજ 1 એપ્રિલ 2026 માં બેંગકોક, થાઇલેન્ડમાં આયોજિત થઈ હતી, જ્યાં ભારતીય તીરંદાજોએ ઉત્કૃષ્ટ પ્રદર્શન કર્યું હતું (જેમાં પાયલ નાગ દ્વારા ગોલ્ડ મેડલ જીતવાનો સમાવેશ થાય છે), સ્ટેજ 2 જૂન 30 થી જુલાઈ 4, 2026 દરમિયાન ચિકિયા (ચેકિયા) માં યોજાયો હતો. અમદાવાદમાં યોજાનારી સ્પર્ધા સ્ટેજ 3 હશે, અને સ્ટેજ 4 ઓક્ટોબર 2026 માં સેન્ટિયાગો, ચિલીમાં રમાશે.
અમદાવાદ 2026 હ્યુન્ડાઈ વર્લ્ડ પેરા સિરીઝમાં 4 વિભાગો સામેલ હશે – રીકર્વ, કમ્પાઉન્ડ, W1 અને VI.
ભારતીય ટુકડીમાં પેરિસ પેરાલિમ્પિક્સના મેડલ વિજેતાઓ શીતલ દેવી, રાકેશ કુમાર, હરવિંદર સિંહ, વર્લ્ડ આર્ચરી પેરા સિરીઝના મેડલ વિજેતા શ્યામ સુંદર સ્વામી, વર્લ્ડ ચેમ્પિયનશિપના મેડલ વિજેતા તોમન કુમાર સહિત અન્ય ખેલાડીઓ સામેલ છે.
SAI મીડિયા સાથે વાત કરતા પેરા આર્ચરી ટીમના કોચ કમ મેનેજર સુરેન્દર સિંહ રંધાવાએ જણાવ્યું હતું કે, “આ એક મહત્વપૂર્ણ રેન્કિંગ ટુર્નામેન્ટ છે, તે એક વૈશ્વિક ટુર્નામેન્ટ છે તેથી વિશ્વની શ્રેષ્ઠ પ્રતિભા અહીં ભાગ લેવા માટે ઉપસ્થિત રહેશે, એશિયન ગેમ્સની બરાબર પહેલાં યોજાઈ રહી હોવાથી આ ઈવેન્ટનું મહત્વ વધુ વધી જાય છે.”
રંધાવાએ ઉમેર્યું હતું કે પ્રારંભિક શિબિરમાં ભાગ લેનારા 29 ખેલાડીઓમાં એવા 11 તીરંદાજો પણ સામેલ છે જેઓ જાપાનમાં યોજાનારી આગામી એશિયન ગેમ્સમાં ભારતનું પ્રતિનિધિત્વ કરશે.
“અહીં ગાંધીનગર કેમ્પમાં રહેલા 29 ખેલાડીઓમાંથી, પસંદગી પામેલા 11 ખેલાડીઓ આઈચી નાગોયા એશિયન ગેમ્સમાં ભારતનું પ્રતિનિધિત્વ કરશે, જેમના માટે સિલેક્શન ટ્રાયલ્સ અગાઉ સોનીપતમાં યોજાયા હતા,” રંધાવાએ સ્પષ્ટતા કરી.
તેમણે NCoE, ગાંધીનગર ખાતે ટુકડીને મળેલી સુવિધાઓ અને સહયોગની પણ પ્રશંસા કરી હતી, “SAI, ગાંધીનગરે ખેલાડીઓ, કોચ અને અધિકારીઓ માટે ખૂબ જ સારી વ્યવસ્થા કરી છે, મેદાન ખૂબ સરસ છે, અને SAI અધિકારીઓ તરફથી જે મદદ મળી છે તે ઉત્કૃષ્ટ છે.”