ત્રણ વયજૂથમાં 200થી વધુ વિદ્યાર્થીઓ બતાવી રમતગમતની પ્રતિભા
(જી.એન.એસ) તા. ૯
વાપી,
રાષ્ટ્રીય કક્ષાની રગ્બી ફૂટબોલ ટુર્નામેન્ટનું આયોજન કરવામાં આવ્યું છે. શહેરના કુંતા વટાર વિસ્તારમાં આવેલી વાપી પબ્લિક સ્કૂલ ખાતે યોજાઈ રહેલી આ સ્પર્ધામાં દેશનાં વિવિધ રાજ્યોની ટીમોએ ભાગ લીધો છે. આ ટુર્નામેન્ટમાં કર્ણાટક, ગોવા, મહારાષ્ટ્ર, ઉત્તર પ્રદેશ, ગુજરાત, રાજસ્થાન, બિહાર અને ઝારખંડ સહિતનાં રાજ્યોના 200થી વધુ વિદ્યાર્થીઓ ભાગ લઈ રહ્યા છે. ટુર્નામેન્ટના પ્રારંભ સાથે જ મેદાનમાં ખેલાડીઓનો ઉત્સાહ જોવા મળ્યો હતો અને વિવિધ ટીમો વચ્ચે રસાકસીભર્યા મુકાબલાઓ યોજાયા હતા.
આ રાષ્ટ્રીય કક્ષાની ટુર્નામેન્ટનું આયોજન 14 વર્ષ, 17 વર્ષ અને 19 વર્ષના ત્રણ વયજૂથમાં કરવામાં આવ્યું છે. અલગ-અલગ કેટેગરીમાં ભાગ લેનારા વિદ્યાર્થીઓએ પોતાની રમતગમતની કુશળતા, ઝડપ અને ટીમવર્કનું પ્રદર્શન કર્યું હતું. મેદાનમાં ખેલાડીઓની ચપળતા અને પ્રતિસ્પર્ધી ટીમને પડકાર આપવાની ક્ષમતાને કારણે મેચો રોમાંચક બની રહી હતી. દરેક ટીમ જીત મેળવવા માટે વ્યૂહરચના સાથે મેદાનમાં ઊતરી હતી, જેના કારણે ખેલાડીઓની સાથે રમતપ્રેમીઓમાં પણ ઉત્સુકતા જોવા મળી હતી.
રગ્બીની રમત દરમિયાન થોડી ક્ષણોમાં લેવાતા નિર્ણયો મેચની દિશા બદલી શકે છે. આથી રગ્બીને શારીરિક ક્ષમતા અને માનસિક સતર્કતાની કસોટી ગણવામાં આવે છે. રગ્બીની રમતમાં એક ખેલાડીના વ્યક્તિગત પ્રદર્શન કરતાં સમગ્ર ટીમનું સંકલન મહત્ત્વપૂર્ણ હોય છે. ખેલાડીઓએ મેદાનમાં એકબીજાને સહકાર આપવો, યોગ્ય સમયે બોલ પાસ કરવો અને ટીમની વ્યૂહરચના અનુસાર આગળ વધવું પડે છે. સાથે જ આ રમતમાં શિસ્ત, નિયમોનું પાલન અને ખેલદિલીનું પણ વિશેષ મહત્ત્વ છે.
વાપીમાં પ્રથમ વખત રાષ્ટ્રીય કક્ષાની રગ્બી ટુર્નામેન્ટનું આયોજન થવું શહેરના રમતગમત ક્ષેત્ર માટે મહત્ત્વપૂર્ણ પહેલ બની શકે છે. આ પ્રકારની સ્પર્ધાઓથી સ્થાનિક વિદ્યાર્થીઓને રગ્બી જેવી રમત વિશે જાણકારી મેળવવા અને તેમાં રસ કેળવવા પ્રોત્સાહન મળે છે.