(જી.એન.એસ) તા. ૨
શિક્ષણ સંબંધિત ફરિયાદોને લઈને શરૂ થયેલા વિદ્યાર્થીઓના વિરોધ પ્રદર્શનોએ કેટલાક સ્થળોએ હિંસક સ્વરૂપ ધારણ કર્યા બાદ, શુક્રવારે ફ્રાન્સમાં લગભગ ૪૦૦ શાળાઓ બંધ રહેવાની શક્યતા છે.
ફ્રાન્સના શિક્ષણ મંત્રી એડ્યુઆર્ડ ગેફ્રેએ ગુરુવારે મોડી રાત્રે ‘ફ્રાન્સ ૨’ ચેનલને આપેલા એક ઇન્ટરવ્યુમાં જણાવ્યું હતું કે, “મારી જાણકારી મુજબ ૪૦૦થી થોડી વધુ શાળાઓ અને અન્ય શૈક્ષણિક સંસ્થાઓ બંધ રહેશે.”
વડાપ્રધાન સેબેસ્ટિયન લેકોર્નુની નજીકના સૂત્રોના જણાવ્યા અનુસાર, ગુરુવારે મળેલી કટોકટીની બેઠકમાં ગુપ્તચર એજન્સીઓએ માહિતી આપી હતી કે આ વિરોધ આંદોલન ‘લા ફ્રાન્સ ઇન્સોમિસ’ (LFI) ના સભ્યો સહિત કટ્ટર ડાબેરી વિચારધારા ધરાવતા રાજકારણીઓ દ્વારા શરૂ કરવામાં આવ્યું હતું.
LFI ના ધારાસભ્ય લુઈસ બોયાર્ડે ફ્રેન્ચ પ્રસારણકર્તાઓ સમક્ષ આ દાવાનો ઇનકાર કર્યો હતો.
શિક્ષકોની અછત અને જર્જરિત શાળાની ઇમારતો સામેના વિરોધ પ્રદર્શનો ગયા મહિને પેરિસ વિસ્તારમાં શરૂ થયા હતા, પરંતુ દેશભરમાં ફેલાવાની સાથે તે વધુ હિંસક બન્યા છે; જેમાં ડઝનબંધ લોકો ઘાયલ થયા છે અને પોલીસે સેંકડો લોકોની ધરપકડ કરી છે.
અધિકારીઓએ જણાવ્યું હતું કે, ગુરુવારે વિદ્યાર્થી પ્રદર્શનકારીઓએ ઓછામાં ઓછી બે હાઈસ્કૂલોમાં આગ લગાવી હતી, જ્યારે દક્ષિણના શહેર માર્સેલીમાં એક ત્રીજી શાળામાં ભૂલથી શિક્ષકો પર પેટ્રોલ છંટાઈ ગયું હતું. પૂર્વમાં સ્ટ્રાસબર્ગ ખાતે ઓછામાં ઓછી એક કાર સળગાવી દેવામાં આવી હતી અને દક્ષિણ-પશ્ચિમમાં ટુલૂઝ ખાતે તોફાન-વિરોધી પોલીસ (રાયોટ પોલીસ) અને યુવાનો વચ્ચે ઘર્ષણ થયું હતું.