(જી.એન.એસ) તા. ૯
નવી દિલ્હી,
એક મહત્વના ઘટનાક્રમમાં ભારતીય વિદેશ મંત્રાલયે જણાવ્યું હતું કે, ચોક્કસ કંપનીઓ માટે ‘પરમેનન્ટ લેબર સર્ટિફિકેશન’ (PERM) પ્રોગ્રામ અંગે યુએસ શ્રમ વિભાગનો નિર્ણય H-1B વિઝા પ્રોગ્રામથી અલગ છે.
મંત્રાલયે એક નિવેદનમાં કહ્યું હતું કે PERM અરજીઓ સ્થગિત કરવાથી હાલના H-1B વિઝાની માન્યતા અથવા H-1B વિઝા ધારકો અને તેમના આશ્રિતોની સ્થિતિ પર કોઈ અસર પડતી નથી. મંત્રાલયે વધુમાં ઉમેર્યું હતું કે અસરગ્રસ્ત કંપનીઓના પાત્ર કર્મચારીઓની કાયમી નિવાસ (પરમેનન્ટ રેસિડેન્સી) અથવા ‘ગ્રીન કાર્ડ’ની પ્રક્રિયા પર કેટલીક અસર પડી શકે છે.
આ સંદર્ભમાં યુએસના ઉપરાષ્ટ્રપતિની ટિપ્પણીઓનો ઉલ્લેખ કરતા મંત્રાલયે કહ્યું હતું કે આવી ટિપ્પણીઓ અસ્થાને છે અને તે એ હકીકતને અવગણે છે કે યુનાઇટેડ સ્ટેટ્સમાં ભારતીય વ્યાવસાયિકો ઉચ્ચ શિક્ષિત અને કુશળ છે, જે ત્યાંની અર્થવ્યવસ્થા અને નવીનતા (ઇનોવેશન) ઇકોસિસ્ટમમાં મહત્વપૂર્ણ યોગદાન આપે છે. મંત્રાલયે કહ્યું કે પ્રતિભાની અવરજવર (ટેલેન્ટ મોબિલિટી) બંને દેશોની અર્થવ્યવસ્થા માટે મૂલ્યવાન છે.
તે ભારતીયો માટે તકો ઊભી કરે છે તેની સાથે સાથે યુએસ કંપનીઓને અત્યાધુનિક પ્રતિભા, નવીનતા, સંશોધન, ઉત્પાદકતા, સ્પર્ધાત્મકતા અને રોજગાર સર્જનમાં પણ મદદ કરે છે, તેમજ યુએસમાં શેરધારકોની સંપત્તિમાં વધારો કરે છે. મંત્રાલયે જણાવ્યું હતું કે યુએસ દ્વારા જાહેર કરાયેલા પગલાં બંને દેશોની સહિયારી મહત્વાકાંક્ષાઓને આગળ વધારતા નથી. મંત્રાલયે નોંધ્યું હતું કે તે આ મુદ્દાને લગતા ઘટનાક્રમ પર સતત નજર રાખશે.