(જી.એન.એસ) તા. ૧૧
અમદાવાદ,
શહેરના જોધપુર વિસ્તારમાં બપોરના સમયે BRTS બસ સ્ટેન્ડ નજીક આવેલી એક મેડિકલ સ્ટોરના ગોડાઉનમાં અચાનક આગ ફાટી નીકળતા વિસ્તારમાં અફરાતફરીનો માહોલ સર્જાયો હતો. ગોડાઉનમાં દવાઓ અને અન્ય મેડિકલ સામગ્રી હોવાથી આગ ઝડપથી પ્રસરી હતી.
આગ લાગવાની જાણ થતા જ સ્થાનિક લોકોએ ફાયર બ્રિગેડને જાણ કરી હતી. ઘટનાની ગંભીરતાને જોતા ફાયર વિભાગની 4 ગાડીઓનો કાફલો તાત્કાલિક સ્થળ પર પહોંચી ગયો હતો. ફાયર ફાઈટરો દ્વારા ચારેબાજુથી પાણીનો મારો ચલાવીને આગને વધુ ફેલાતી અટકાવવા અને તેના પર કલાકોની મેહનત બાદ કાબૂ મેળવવામા સફળતા મળી હતી.
આ ઘટના મામલે મીડિયા સુત્રો થકી પ્રાથમિક માહિતી અનુસાર, આ ઘટનામાં અત્યાર સુધી કોઈ જાનહાનિના સમાચાર નથી. જોકે, ગોડાઉનમાં રાખવામાં આવેલો દવાનો જથ્થો અને અન્ય મેડિકલ ઇક્વિપમેન્ટ બળીને ખાખ થઈ ગયા હોવાથી મોટા આર્થિક નુકસાનની ભીતિ સેવાઈ રહી છે. મેડિકલ ગોડાઉનમાં આગ કયા કારણોસર લાગી તે હજુ સુધી સ્પષ્ટ થયું નથી. શોર્ટ સર્કિટના કારણે આગ લાગી હોવાની પ્રાથમિક શંકા વ્યક્ત કરવામાં આવી રહી છે, પરંતુ ફાયર વિભાગ દ્વારા આગ સંપૂર્ણપણે બુઝાઈ ગયા બાદ તપાસ હાથ ધરવામાં આવશે.
BRTS સ્ટેન્ડની નજીક જ આગ લાગી હોવાથી ટ્રાફિક વ્યવસ્થા પર પણ તેની અસર જોવા મળી હતી અને પોલીસ દ્વારા સાવચેતીના ભાગરૂપે આસપાસનો વિસ્તાર ખાલી કરાવવામાં આવ્યો છે.