(જી.એન.એસ) તા. 28
નવી દિલ્હી,
હવામાન વિભાગના અહેવાલ મુજબ એક પછી એક બે વેસ્ટર્ન ડિસ્ટર્બન્સ સક્રિય થઈ રહ્યા છે. એક 29 જાન્યુઆરીથી પશ્ચિમ હિમાલયન ક્ષેત્રને અસર કરશે. બીજી ફેબ્રુઆરી 2025ના રોજ સક્રિય થશે. પ્રથમ વેસ્ટર્ન ડિસ્ટર્બન્સ 29 જાન્યુઆરીએ હિમાલયના ઉપરના ભાગમાં સક્રિય થશે. આ પછી તરત 1 ફેબ્રુઆરીએ બીજા વેસ્ટર્ન ડિસ્ટર્બન્સની પણ અસર જોવા મળશે. બંનેની અસરને કારણે પહાડી વિસ્તારોમાં હિમવર્ષા થવાની સંભાવના છે.
જાન્યુઆરીના અંતિમ દિવસોમાં દિલ્હી-NCRમાં વરસાદ પડી શકે છે. પંજાબ, હરિયાણા અને પશ્ચિમ ઉત્તર પ્રદેશમાં 30 જાન્યુઆરીથી 1 ફેબ્રુઆરી વચ્ચે વરસાદની પણ શક્યતા છે. આગામી દિવસોમાં તમિલનાડુ, પુડુચેરી, કેરળ, આંધ્રપ્રદેશ, કર્ણાટકમાં ભારે વરસાદની સંભાવના છે. જમ્મુ-કાશ્મીર અને હિમાચલ પ્રદેશમાં 29 જાન્યુઆરીથી 1 ફેબ્રુઆરી સુધી વરસાદની શક્યતા છે. હિમવર્ષા પણ થઈ શકે છે.
સાથેજ હવામાન વિભાગે કહ્યું હતું કે, હિમાચલ પ્રદેશ, પંજાબ, હરિયાણા, રાજસ્થાનના વિવિધ ભાગોમાં 2 ફેબ્રુઆરી સુધી ઠંડીનું મોજુ યથાવત રહી શકે છે. ઉત્તર પ્રદેશ, ઉત્તરાખંડ, પંજાબ, હરિયાણા, ચંદીગઢ, દિલ્હી, ઓડિશા, બિહાર, ગંગાજળ પશ્ચિમ બંગાળ, આસામ અને મેઘાલયમાં 31 જાન્યુઆરી સુધી સવારે અને સાંજે ગાઢ ધુમ્મસ છવાઈ જવાની પણ શક્યતાઓ છે.