નવીનીકરણીય ઊર્જાથી સાઉદીમાં ક્રૂડ વપરાશમાં ઘટાડો…!!

વિશ્વનો સૌથી મોટો ક્રૂડ તેલ નિકાસકાર દેશ સાઉદી અરેબિયા હવે તેની વીજળીની જરૂરિયાતોને પહોંચી વળવા માટે નવીનીકરણીય ઊર્જા તરફ ઝડપથી આગળ વધી રહ્યું છે, જેનાથી ક્રૂડનો વપરાશ તેમજ તેના ભાવ ઘટશે અને નિકાસમાં વધારો થશે. અગાઉ, ઉનાળાની કાળઝાળ ગરમીમાં વીજળી ઉત્પન્ન કરવા માટે સાઉદી અરેબિયામાં મોટા પ્રમાણમાં ક્રૂડ તેલ અને ઇંધણ તેલ બાળવામાં આવતું હતું. દેશના તેલના વપરાશના લગભગ ૨૫-૩૦% ફક્ત પાવર પ્લાન્ટમાં જ વપરાશ થતો હતો.

હવે ત્યાંની સરકારે ૨૦૩૦ સુધીમાં ૧૩૦ ગીગાવોટ નવીનીકરણીય ઊર્જા સ્થાપિત કરવાનો લક્ષ્યાંક નક્કી કર્યો છે, જે ભારતમાં હાલની સૌર ઊર્જા ક્ષમતા જેટલી છે. જો આ યોજના સફળ થશે, તો આગામી પાંચ વર્ષમાં વિશ્વમાં ક્રૂડ તેલની માંગમાં સૌથી મોટો ઘટાડો આવી શકે છે. સાઉદી અરેબિયામાં મોટા પ્રોજેક્ટ્સ પૂર્ણ થવા અંગે ઘણીવાર શંકા રહી છે, કારણ કે ઘણા મેગા પ્રોજેક્ટ્સ અધૂરા છે. પરંતુ આ વખતે નવીનીકરણીય ઉર્જામાં કામ ઝડપથી થઈ રહ્યું છે.

૨૦૨૪થી અત્યાર સુધી, દેશની સૌથી મોટી વીજળી અને પાણી કંપની, છભઉછ પાવરે ૪.૯ ગીગાવોટ સૌર પ્રોજેક્ટ્સ શરૂ કર્યા છે અને આગામી વર્ષના અંત સુધીમાં તે ઉમેરવાનું લક્ષ્ય રાખે છે. આ કંપની ૨૦૩૦ સુધીમાં ૭૮ ગીગાવોટ ક્ષમતા પ્રાપ્ત કરવાનું લક્ષ્ય રાખે છે. સાઉદી અરામકોના વડા અમીન નાસેરના મતે, જો સ્થાનિક વીજ ઉત્પાદનમાંથી ક્રૂડ તેલ દૂર કરવામાં આવે તો તેને નવા કુવા ખોદવા જેટલો ફાયદો થશે. આનો અર્થ એ છે કે નિકાસ માટે વધુ ક્રૂડ તેલ ઉપલબ્ધ થશે. સાઉદી અરેબિયાના ગ્રીડમાં વપરાતા તેલનો જથ્થો ભારતમાં તમામ વાહનો (કાર અને સ્કૂટર) દ્વારા ઉપયોગમાં લેવાતા સંયુક્ત તેલ કરતાં વધુ છે.