એક દિલ્હીમાં પુતિન છે જે દરરોજ મિસાઈલ અમારા પર છોડી રહ્યા છે : સંજય રાઉત

(જી.એન.એસ),તા.૨૪

મુંબઈ

શિવસેનાના સાંસદ સંજય રાઉતે ઈડી, સિબિઆઇ અને આવકવેરા વિભાગની કાર્યવાહીને લઈને ભાજપ પર જોરદાર પ્રહારો શરૂ કર્યા છે. હવે સંજય રાઉતે સીધા વડાપ્રધાન નરેન્દ્ર મોદી પર નિશાન સાધ્યું છે. રશિયા-યુક્રેન યુદ્ધ શરૂ થઈ ગયું છે. આ યુદ્ધમાં ઘણી મિસાઈલો છોડવામાં આવી રહી છે.  આ અંગે ટિપ્પણી કરતા સંજય રાઉતે બુધવારે ટોણો માર્યો અને કહ્યું, ‘અમારા જેવા લોકો પણ દરરોજ યુદ્ધનો અનુભવ કરી રહ્યા છે. દિલ્હીમાં પુતિન બેઠા છે. તેઓ રોજ અમારા પર મિસાઈલ છોડી રહ્યા છે. ઇડી દ્વારા આ મિસાઇલોનો વરસાદ કરવામાં આવી રહ્યો છે. તેમ છતાં અમે ડગમગ્યા નથી. અમે તેની સામે અડગ ટકી રહ્યા છીએ. એવો કટાક્ષ કરતાં સંજય રાઉતે કહ્યું કે દેશનું વાતાવરણ બદલાઈ ગયું છે. રાઉત દૈનિક લોકમતના ઇનામ વિતરણ સમારોહમાં બોલી રહ્યા હતા. આ દરમિયાન સંજય રાઉતે વિધાનસભામાં વિપક્ષના નેતા દેવેન્દ્ર ફડણવીસ પર પણ આકરા પ્રહારો કર્યા હતા. દેવેન્દ્ર ફડણવીસે સત્તા છોડતી વખતે કહ્યું હતું કે ‘હું ફરી પાછો આવીશ’ (પુન્હા યિન), તેમના શબ્દોને યાદ કરીને, તેમના વિરોધીઓ તેમની મજાક  ઉડાવવાનો પ્રયત્ન કરતા હોય છે. આ જ વાતનો ઉલ્લેખ કરતા સંજય રાઉતે દેવેન્દ્ર ફડણવીસનો ઉલ્લેખ કર્યો અને કહ્યું, ‘પૂન્હા યિન વાળા અહીં સાંજે આવવાના છે. તો પણ હું અહીં આવીશ. બાજુમાં બેસીશ. સંજય રાઉત મંગળવારથી નાગપુરના પ્રવાસે છે. શિવસેનાના જનસંપર્ક અભિયાન હેઠળ તેઓ શિવસેનાના કાર્યકરો અને નેતાઓને પ્રેરણા અને માર્ગદર્શન આપવા ત્યાં પહોંચ્યા છે. નાગપુર સહિત વિદર્ભમાં શિવસેનાની પકડ એટલી મજબૂત નથી. તેઓ નાગપુરમાં પાર્ટીને મજબૂત કરવાની રણનીતિ તૈયાર કરવા આવ્યા છે. આ સાથે તેઓ નાગપુરના લોકો સાથે પણ વાતચીત કરી રહ્યા છે અને રાજ્ય સરકારના કામોની માહિતી આપી રહ્યા છે. આ દરમિયાન, સંજય રાઉતે બુધવારે સવારે તે જ મુદ્દાને પુનરાવર્તિત કર્યો હતો કે કેન્દ્રીય તપાસ એજન્સીઓ દ્વારા માત્ર પસંદગીની કાર્યવાહી કરવામાં આવી રહી છે. તેઓએ પીએમ મોદીને ભાજપના નેતાઓના ભ્રષ્ટાચારના પુરાવા પણ આપ્યા છે, તેમની સામે કાર્યવાહી કેમ નથી થતી? શું ભાજપના લોકો રસ્તા પર ભીખ માંગી રહ્યા છે? શું તે બધા દૂધથી ધોયેલા છે? પરંતુ કાર્યવાહી માત્ર મહારાષ્ટ્ર અને પશ્ચિમ બંગાળમાં જ કેમ કરવામાં આવી રહી છે?