ગુજરાતમાં ફરીથી ઠંડીનો રાઉન્ડ શરૂ થશે, સાથેજ મહિનાના અંતમાં માવઠાની પણ આગાહી કરવામાં આવી

(જી.એન.એસ) તા. 22

ગાંધીનગર,

છેલ્લા 48-72 કલાકથી રાજ્યના અનેક જિલ્લાઓમાં બપોરના સમયે ગરમીનો અહેસાસ થઇ રહ્યો છે. અચાનક જ તાપમાનમાં ઘટાડો થતાં ઠંડી ગાયબ થઇ ગઇ છે. પરંતુ ઠંડી ગાયબ નથી થઇ. હવામાન ખાતાનું અને હવામાન આગહીકાર નું માનીએ તો રાજ્યમાં હજુ પણ એક ઠંડીનો રાઉન્ડ આવશે. જેના માટે ગુજરાતવાસીઓ એ તૈયાર રહેવાની જરૂર છે.  આટલું જ નહીં ઠંડીની સાથે જ હવામાન નિષ્ણાંત અંબાલાલ પટેલે માવઠાની પણ આગાહી કરી છે. જેના કારણે હાડ થીજવતી ઠંડી પડવાની આગાહી પણ કરવામાં આવી છે. 

હવામાન આગહીકાર અંબાલાલ પટેલની આગાહી મુજબ 24 જાન્યુઆરી સુધી ગરમી પડશે અને 25 તારીખથી ગુજરાતમાં ફરી ઠંડી શરૂ થશે. ગુજરાતીઓએ ઠંડીના બીજા રાઉન્ડ માટે તૈયાર રહેવું પડશે. આટલું જ નહીં અંબાલાલ પટેલે જાન્યુઆરીના અંતમાં અને ફેબ્રુઆરીની શરૂઆતમાં માવઠું થવાની આગાહી પણ કરી છે. 

જ્યારે હવામાન નિષ્ણાંત પરેશ ગોસ્વામીએ પણ કાતિલ ઠંડીનો ફરીથી રાઉન્ડ આવશે તેવી આગાહી કરી છે. પરેશ ગોસ્વામીના જણાવ્યા મુજબ, ગુજરાતથી ઉત્તર-પૂર્વ દિશાની અંદર રાજસ્થાનના પૂર્વ ભાગ પર સક્રિય થયેલું એન્ટી સાયક્લોન ધીમે-ધીમે નબળું પડી રહ્યું છે. જે આગળ નીકળી જતાં ફરીથી ગુજરાતનું હવામાન બદલાશે. આ એન્ટી સાયક્લોનની અસરના કારણે અત્યારે મહત્તમ તાપમાન 1 થી 3 ડિગ્રી જેટલું ઊંચકાયું છે. 

છેલ્લા 48 કલાક અનુસાર રાજ્યના શહેરોનું તાપમાન

પવનની દિશા બદલાતા રાજ્યના તાપમાનમાં આંશિક ઘટાડો નોંધાયો છે. હાલ પૂર્વથી ઉત્તર પૂર્વીય પવનની દિશા છે. જેના કારણે મોટા ભાગના શહેરોના તાપમાનમાં ઘટાડો જોવા મળ્યો છે. નલિયામાં 11.0 ડિગ્રી તાપમાન નોંધાયું હતું. જ્યારે અમદાવાદમાં 16.2, ગાંધીનગરમાં 13.8 ડિગ્રી, ડીસા 15.0 ડિગ્રી,વલ્લભ વિદ્યાનગર 17.5 ડિગ્રી, ,કંડલા 14.8 ડિગ્રી, અમરેલી 14.6 ડિગ્રી, ભાવનગર 18.0 ડિગ્રી, દ્વારકા 17.1 ડિગ્રી , ઓખા 18.6 ડિગ્રી, પોરબંદર 14.8 ડિગ્રી , વેરાવળ 18.3 ડિગ્રી, રાજકોટ 15.0 ડિગ્રી , સુરેન્દ્રનગર 17.5 ડિગ્રી, મહુવા 16.1 ડિગ્રી અને કેશોદ 14.3 ડિગ્રી, વડોદરા 15.8 ડિગ્રી, સુરત 17.8 ડિગ્રી, ભુજ 14.4 ડિગ્રી તાપમાન નોંધાયું છે.