સ્ટેચ્યુ ઓફ યુનિટીથી નવી પેઢીના નેતાઓને સરદારનો પરિચય થયો

આજ ૩૧ ઓક્ટોબરના રોજ સરદાર જયંતીના દિવસે આપણા વડાપ્રધાન નરેન્દ્રભાઈ મોદીએ વિશ્વના સહુથી ઊંચા સરદાર પટેલના સ્ટેચ્યુ નું ઉદઘાટન કર્યું છે. છેલ્લા એક સપ્તાહથી મિડીયામાં સરદાર વલ્લભભાઈ પટેલ ની જીવન શૈલી , રાજકીય કુનેહ , તેમનું મનોબળ , તેમની સમાજ પ્રત્યેની કર્તવ્યનિષ્ઠા , રાષ્ટ્ર ભાવના સહિતના અનેક મુદ્દાઓને લઈને પુસ્તકોમાંથી શોધી શોધી ને લેખ લખાયા છે કે ચર્ચાઓ થઇ છે .
આનંદ અને આશ્ચર્ય એ છે કે આટલા વર્ષો પછી ગુજરાત અને દેશની નવી પેઢીને સરદાર પટેલનો વાસ્તવિક પરિચય થયો છે . ગળામાં પક્ષની કંઠી સમાન ખેસ ધારણ કરીને ન્યુઝ ચેનલો ઉપર ગળા ફાડીને રાજકીય દલીલબાજી કરતા પ્રોફેશનલ પોલીટીશ્યનો ને આપણા ગુજરાતના બે મહાન સપૂતો મહાત્મા ગાંધી અને સરદાર પટેલને જાણવા – ઓળખવા નો સમય જ ન હતો . મેં ઘણા નેતાઓને સરદાર પટેલ વિષે પૂછ્યું હતું જેમ કે તેઓ અમદાવાદ શહેર નગરપાલિકાના પ્રમુખ કઈ સાલમાં થયા હતા ? અમદાવાદ નગરપાલિકા ના પ્રમુખ સરદાર પટેલે અમદાવાદમાં મોટા વિકાસના કામો કયા કાર્ય હતા ? આવા એક પણ સવાલનો આજના ભાજપ – કોંગ્રેસના નેતાઓ જવાબ આપી શક્યા ન હતા .
આપણા નરેન્દ્રભાઈ એ સરદાર સરોવર ખાતે જ વિશ્વની સહુથી ઉંચી પ્રતિમા સરદાર પટેલની બનાવીને સરદાર પટેલની સાચી ઓળખ ગુજરાત , દેશ અને વિશ્વને આપી છે . હવે કેવડીયા કોલોની એ વિશ્વનું પ્રવાસન ધામ બનશે . સરદાર પટેલની સાથે ગુજરાતની પણ વૈશ્વિક ઓળખ ઉભી થશે . અને વિદેશથી આવનારો પ્રવાસી માત્ર સ્ટેચ્યુ ઓફ યુનિટી જોઇને જતો નહિ રહે . અમદાવાદના ગાંધી આશ્રમની પણ અચૂક મુલાકાત લેશે . જેથી હવે ગાંધી આશ્રમ ને પણ આટલું જ મહત્વ આપીને અત્યારે નજરે ચડતી કેટલીક ખામીઓ , અવ્યવસ્થા ને દુર કરવા જોઈએ .
રાજકારણીઓ એ પણ હવે ઇતિહાસનું મહત્વ સમજી તે શીખવાનો પ્રયાસ કરવો જોઈએ . માત્ર મોદી ભક્ત અને રાહુલ ભક્ત રહેવાથી રાજકારણના પાઠ શીખી ગયાનો સંતોષ માનવો જોઈએ નહિ .
આજે સરદાર પટેલના ‘ સ્ટેચ્યુ ઓફ યુનિટી ’ નું ઉદઘાટન થયું છે . ઓડીટર મીડિયા અને વિપક્ષ અનેક ક્ષતિઓ શોધીને આલોચના કરશે . પરંતુ ગુજરાત અને સરદાર પટેલની ઉભી થયેલી વૈશ્વિક ઓળખ સામે નાની મોટી ભૂલોને ક્ષમ્ય ગણાવી જોઈએ .

લ્યો , હવે રિઝર્વબેન્કની સ્વાયતતા સમાચારનો મુદ્દો બન્યો

સી.બી.આઈ.ના ઉચ્ચ અધિકારીઓ આપસમાં એક બીજાના કપડા ફાડીને દેશની એક સર્વોચ્ચ અને સ્વાયત સંસ્થાની આબરૂ લુંટી છે . હવે નવા મુદ્દાનો જન્મ થયો છે . દેશની અર્થતંત્રની ધરોહર સમી રિઝર્વ બેંક વિવાદમાં આવી છે . જયારે નોટબંધી નો નિર્ણય થયો અને રિઝર્વ બેન્કે એક પછી એક મોટા નિર્ણયો લીધા અને પાછા ખેચ્યા ત્યારે જ સહુથી વધુ આબરૂ નું લીલામ થઇ ચૂક્યું હતું . પરંતુ ત્યારે તેમના બચાવમાં કેન્દ્ર સરકાર અને નાણામંત્રી અરુણ જેટલી હતા . હવે એક પછી એક બેંક કૌભાંડોના પગલે કેન્દ્ર સરકાર ભીસમાં મુકાવા લાગી છે . આગામી ચૂટણીમાં ભાગેડુ બેંક કૌભાંડીઓ ચુંટણીનો મુદ્દો બનશે . આ બધું ભાજપને નુકસાન કરતા હોવાથી ભાજપના જ ખાસ પસંદ કરાયેલા ગવર્નર ઊર્જિત પટેલને ખુદ નાણામંત્રી એ N.P.A. માટે જવાબદાર ઠેરવીને વિવાદ સર્જ્યો છે . સામે પક્ષે ઊર્જિત પટેલ કેન્દ્ર સરકાર દ્વારા R.B.I ની સ્વાયતતા છીનવી લેવાનો આક્ષેપ કર્યો છે .
આ બે સંસ્થાઓના વિવાદ પછી ઉચ્ચ અધિકારીઓએ એક તારણ કાઢ્યું કે “ સાહેબના ખાસ ” ગણાવી ને કોઈ ખોટી રીતે પ્રમોશન મળી જાય અને ઉચ્ચ હોદ્દા પર બેસવા મળે , તો સમજી લેવાનું કે હવે ઊંડી ખાઈમાં ધકેલાઈ જવા તૈયાર રહેવાનું છે.

ગુજરાત કોંગ્રેસના નેતાઓએ કયું આંદોલન કરવું તે દિલ્હી થી નક્કી થાય છે

ગુજરાતમાં પ્રજાને શું તકલીફ છે ? સરકાર પાસે પ્રજા શું ઈચ્છે છે ? અને સરકાર પ્રજા પર કયા મુદ્દે અન્યાય કરે છે ? આ બધા જ પ્રશ્નોના જવાબ ગુજરાત કોગ્રેસના પ્રદેશ પ્રમુખ અને વિપક્ષના નેતા જાણે છે . પરંતુ આ પ્રજાકીય પ્રશ્ને આંદોલન કરવા અને પ્રજાની પડખે ઉભા રહેવા માટે તેમણે દિલ્હીને પૂછવું પડે છે . હાઈકમાન્ડ એવા મુદ્દાઓ ઉપર આંદોલન કરવાના આદેશો આપે છે કે જે રાહુલ ગાંધી ને પસંદ હોય . અને તે રાષ્ટ્રીય મુદ્દા હોય છે .નેશનલ ઈશ્યુ થી વિશેષ સ્થાનિક મુદ્દાઓ જેવા કે પાક વીમો , ટેકાના ભાવે ખરીદી , પોષણક્ષમ ભાવો , શિક્ષિત બેરોજગારી ના પ્રશ્નો . આ મુદ્દા ગુજરાતમાં વધુ તિવ્ર હોવા છતાં આંદોલન અને નિવેદનો સ્ટેચ્યુ ઓફ યુનિટી મુદ્દે આદિવાસીઓનો અસંતોષ , સી.બી.આઈ ના અધિકારીના ભ્રષ્ટાચાર , ભાજપના નેતાઓના આક્ષેપોના જવાબ અને વળતા આક્ષેપો આવા બધા મુદ્દાઓમાં પ્રચાર પ્રસાર સમેટાઈ જાય છે . અને ગુજરાતની પ્રજાના મહત્વના મુદ્દા કોરાણે ધકેલાઈ જાય છે . અને આવા જ કારણોસર ગુજરાતની પ્રજા ચુંટણીમાં કોંગ્રેસને કોરાણે ધકેલી દે છે .

દીપાવલી પર્વની ઉજવણી દીપ પ્રાગટ્યથી શોભે, ફટાકડાથી નહિ

પર્યાવરણના મુદ્દે સુપ્રીમકોર્ટ દ્વારા દિવાળીના તહેવારોમાં ફટાકડા ફોડવાના મુદ્દે આદેશ બહાર પાડ્યો છે . જેમાં રાત્રે ૮ થી ૧૦ સુધી જ ફટાકડા ફોડવા જણાવ્યું છે . કોર્ટનો આ આદેશ સોશિયલ મીડિયામાં વ્યાપક ટ્રોલ થયો છે . પરંતુ વાસ્તવિક્તા એ છે કે દેશમાં જે પ્રકારે ફટાકડા ફોડવામાં આવી રહ્યા છે , તેમાં માણસાઈ જેવી મહત્વની બાબત ભુલાઈ જાય છે . ખુબ વધુ અવાજ ના બોમ્બ થી પશુ – પક્ષીઓ ઉપરાંત નાના બાળકો અને બીમાર દર્દીઓને ખુબજ તકલીફ થાય છે . ઉજાસનું પર્વ છે , તો અવાજ વિના રોશની ફેલાવતા ફટાકડા ફોડી શકાય . પરંતુ અન્ય કોઈનો વિચાર કર્યા વિના ઉજવાતા ઉત્સવો પર હવે પ્રજાએ જાતે જ સ્વયં શિસ્ત દ્વારા પુનઃ વિચાર કરવાની જરૂર તો છે જ . એજ રીતે લગ્ન કે અન્ય ધાર્મિક પ્રસંગે જાહેર માર્ગ ઉપર ડીજે સ્પીકર દ્વારા જે ઘોંઘાટ ફેલાવવામાં આવે છે તેના ઉપર પણ નિયંત્રણ આવવા જોઈએ . અને તેમાં શરૂઆત રાજકીય રેલીઓથી થવી જોઈએ . રાજકીય પક્ષોને જાહેર માર્ગ ઉપર ફટાકડા ફોડવાની અને જાહેર માર્ગના ટ્રાફિકને અવરોધવાની છૂટ હોઈ શકે જ નહિ . નેતાઓએ આવી છૂટ લેવાનો આગ્રહ પણ રાખવો જોઈએ નહિ . પરંતુ રાજકીય પક્ષો તેમને સમાજ – નાગરિકોથી અલગ અને ઉપર ગણે છે . દરેક કાયદાઓથી તેઓ ઉપર હોવાનું માને છે . પ્રજા બધું જુએ છે પરંતુ બોલી શક્તિ નથી . આ ડર અને ખોફ પણ લોકતંત્ર માટે હાનીકારક જ કહી શકાય .