આદિપુરુષ વિવાદ પર કેન્દ્રીય મંત્રીએ કહી સ્પષ્ટ વાત, ‘ભાવનાઓને ઠેસ પહોંચાડવાનો કોઈને અધિકાર નથી’

(GNS),20

ભગવાન રામના જીવન પર આધારિત ફિલ્મ આદિપુરુષના વિવાદ બાદ હવે કેન્દ્ર સરકાર પણ એક્શનમાં આવી છે. માહિતી અને પ્રસારણ મંત્રી અનુરાગ ઠાકુરે સ્પષ્ટ કર્યું છે કે, કોઈને કોઈની ભાવનાઓને ઠેસ પહોંચાડવાનો અધિકાર નથી. આ જ કારણ છે કે, હવે ફિલ્મના ડાયલોગ બદલવાની ચર્ચા છે. તેણે મીડિયા સાથેની વાતચીત દરમિયાન કહ્યું, ‘CBFC (સેન્ટ્રલ બોર્ડ ઓફ ફિલ્મ સર્ટિફિકેશન) એ જે નિર્ણય લેવાનો હતો તે લીધો છે. જે સીબીએફસીનું કામ પણ છે. ફિલ્મના નિર્માતા-દિગ્દર્શક કે જેઓ ફિલ્મના લેખક પણ છે તેમણે ફિલ્મના સંવાદો બદલવાની વાત કરી છે. કોઈને કોઈની ભાવનાઓને ઠેસ પહોંચાડવાનો અધિકાર નથી. હિંદુ સેનાના રાષ્ટ્રીય અધ્યક્ષ વિષ્ણુ ગુપ્તા વતી દિલ્હી હાઈકોર્ટમાં ફિલ્મ આદિપુરુષ વિરુદ્ધ જાહેર હિતની અરજી પણ દાખલ કરવામાં આવી છે. અરજીમાં કહેવામાં આવ્યું છે કે, ફિલ્મમાં ભગવાન શ્રીરામની મજાક ઉડાવવામાં આવી છે. આથી કોર્ટમાં ફિલ્મ પર પ્રતિબંધ મૂકવાની માંગ કરવામાં આવી છે. જેમણે આદિપુરુષ ફિલ્મ જોઈ છે તેઓ કહે છે કે, તેમાં વપરાયેલી ભાષા ભગવાન શ્રીરામ અને રામાયણના સમયની ત્રેતાયુગની ભાષા સાથે મેળ ખાતી નથી. ફિલ્મમાં એક જગ્યાએ ડાયલોગનો ઉપયોગ કરવામાં આવ્યો છે, ‘તેરી જલી ના?’ જેણે પણ આ ડાયલોગ્સ સાંભળ્યા તે આશ્ચર્યચકિત થઈ ગયા. આવા સંવેદનશીલ મુદ્દા પર બનેલી ફિલ્મમાં અનેક પાયાની ભૂલો છે. રાવણની લંકા સોનાની હતી. આદિપુરુષ ફિલ્મમાં તેને કાળો દેખાડવામાં આવ્યો છે. રાવણનું પાત્ર ભજવતા સૈફ અલી ખાનનો લુક પણ વાસ્તવિક જીવનમાં રાવણના પાત્ર સાથે મેળ ખાતો નથી.