ખેડૂતોના આંદોલનની અસર વેપાર-ધંધા પર પડી, ૩૦૦ કરોડનું નુકશાન થયું

(જી.એન.એસ),તા.૨૧

મુંબઈ,

ખેડૂતોના આંદોલનની અસર વેપાર-ધંધા પર પણ જોવા મળી રહી છે. દેશના વેપારીઓના સંગઠન કોન્ફેડરેશન ઓફ ઓલ ઈન્ડિયા ટ્રેડર્સના આંકડા મુજબ ખેડૂતોના પ્રદર્શનને કારણે વેપારને અસર થઈ રહી છે. ખેડૂતોના આંદોલનને કારણે એકલી દિલ્હીમાં અત્યાર સુધીમાં 300 કરોડ રૂપિયાના વેપારનું નુકસાન થઈ રહ્યું છે. અંબાલા શહેરનું કાપડ બજાર ઠપ્પ થઈ ગયું છે. દરરોજ અન્ય રાજ્યોમાંથી લગભગ 5 લાખ વેપારીઓ નજીકના રાજ્યોમાંથી ખરીદી માટે દિલ્હી આવે છે. ખેડૂતોના આંદોલનને કારણે આ વેપારીઓએ દિલ્હી આવવું બંધ કરી દીધું છે. CAT અનુસાર, રોડ બ્લોક વિસ્તારોની નજીક આવેલી દુકાનોને ધંધાનું મોટું નુકસાન થઈ રહ્યું છે, કારણ કે હાઈવે બ્લોક માત્ર ગ્રાહકોને જ નહીં પરંતુ લોજિસ્ટિક કામગીરીને પણ અસર કરે છે. આ આંદોલનનો બોજ હવે મોંઘવારીના રૂપમાં સામાન્ય જનતા પર પડવાનો છે. ટ્રકોની અવરજવરને અસર થવાને કારણે માંગ-પુરવઠાના તફાવતની રમત શરૂ થાય છે. જેના કારણે રોજબરોજની વસ્તુઓ સામાન્ય લોકો સુધી સરળતાથી પહોંચી શકતી નથી. જો તેઓ પહોંચે તો પણ તેમના ભાવ આસમાને ગયા છે.

લસણ અને ડુંગળી જેવી રોજીંદી વપરાતી ચીજવસ્તુઓ બજારમાં મોંઘી થઈ ગઈ છે, જો આંદોલન બંધ નહીં થાય તો આગામી દિવસોમાં મોંઘવારીનો બોજ વધુ વધી શકે છે. દિલ્હી, નોઈડા, ગ્રેટર નોઈડા ઉપરાંત અંબાલાના કાપડ બજારમાં પણ આ આંદોલનની અસર જોવા મળી રહી છે. MSP ગેરંટી એક્ટને લઈને તેમની માંગ પર અડગ રહેલા ખેડૂતો અંબાલાના શંભુ ટોલ પ્લાઝા પર પણ વિરોધ કરી રહ્યા છે. જેના કારણે અહીંનું કાપડ બજાર ઠપ્પ થઈ ગયું છે. કાપડ માર્કેટ સુધી પહોંચતો ટોલ સંપૂર્ણ બંધ કરી દેવામાં આવ્યો છે. તેથી, આવવા જવાનું સંપૂર્ણ બંધ થવાથી, વેપારીઓએ તેમની દુકાનો બંધ કરવી પડી છે. ખેડૂતો એમએસપી ગેરંટી એક્ટને લઈને તેમની માંગ પર અડગ છે. જો સરકાર આ માંગણીઓ સ્વીકારે છે તો સરકારી તિજોરી પર 10 લાખ કરોડ રૂપિયાનો બોજ પડી શકે છે. આંકડાઓ અનુસાર, વર્ષ 2020 માટે કુલ MSP ખરીદી 2.5 લાખ કરોડ રૂપિયા છે. જે કુલ કૃષિ પેદાશના લગભગ 25 ટકા જેટલું છે. આવી સ્થિતિમાં જો સરકાર MSP ગેરંટી કાયદો લાવે છે તો સરકારી તિજોરી પર મોટો બોજ પડશે. આ સમગ્ર સમસ્યાને સમજવા માટે પહેલા એ સમજવું જરૂરી છે કે સરકાર દરેક પાક પર MSP નથી આપતી. સરકાર દ્વારા 24 પાક પર એમએસપી પણ નક્કી કરવામાં આવી છે.