કુલદીપને સારી બોલિંગ બદલ ટીમનું સમર્થન મળી રહ્યું છે : યુઝવેન્દ્ર ચહલ

(GNS),07

ભારતના લેગ સ્પિનર યુઝવેન્દ્ર ચહલનું માનવું છે કે કુલદીપ યાદવને તેના સ્થાને એશિયા કપ અગાઉ ભારતીય વન-ડે ટીમમાં મળી રહેલી તક બદલ તેને કોઈ જ અફસોસ નથી. વેસ્ટ ઈન્ડિઝ સામે ત્રણ વન-ડે પૈકી એકપણ મેચમાં યુઝવેન્દ્ર ચહલને ટીમમાં સ્થાન મળ્યું નહતું. આઈપેલ બાદ લેગ સ્પિનરને પ્રથમ ટી20માં ટીમ ઈન્ડિયા તરફથી રમવાની તક સાંપડી હતી અને ચહલે બે વિકેટ પણ ઝડપી હતી પરંતુ ભારતનો ચાર રને પરાજય થયો હતો. ચહલના મતે કુલદીપ સારી બોલિંગ કરી રહ્યો હોવાથી તેને ટીમનું સમર્થન મળી રહ્યું છે. ટીમનું સંયોજન અમારી પ્રાથમિકતા હોય છે અને આ કોઈ નવી બાબત નથી. સાતમાં ખેલાડી તરીકે રવિન્દ્ર જાડેજા અને અક્ષર પટેલને સામાન્ય રીતે રમાડવામાં આવે છે. જો વિકેટ સ્પિનરનો સાથ આપતી હોય તો જ ત્રણ સ્પિનરનો ટીમમાં સમાવેશ કરવામાં આવે છે. હું નેટ્સમાં આકરી પ્રેક્ટિસ કરવાનું ચાલુ રાખીશ જેથી જ્યારે પણ તક મળે ત્યારે તેને ઝડપી શકું તેમ ચહલે જણાવ્યું હતું. વન-ડે વર્લ્ડ કપને આડે હવે ફક્ત બે મહિનાનો સમય બાકી છે ત્યારે ચહલને વન-ડે ટીમમાં તક મળવા અંગે અસમંજસતા રહેલી છે.

ચહલે આ બાબતે જણાવ્યું કે, અમે પ્રોફેશ્નલ ક્રિકેટર છીએ. હું આઈપીએલ બાદ બે મહિના પછી રમી રહ્યો છું. આ વ્યક્તિગત રમત નથી અને તમે ટીમ માટે રમી રહ્યા છો. કેટલીક વખત ખેલાડીને બે શ્રેણી સુધી બહાર બેસી રહેવું પડે છે, એનો અર્થ એ નથી કે તે ટીમનો હિસ્સો નથી. હું ભારતની જર્સી પહેરવા મળે છે તેનાથી ખુશ છું. હું તક ગુમાવવાનો અફસોસ કરવાને બદલે મળેલી તક બદલ મારી જાતને નસીબદાર ગણું છું તેમ ચહલે વધુમાં ઉમેર્યું હતું. નિકોલસ પૂરને પ્રથમ ટી20માં ચહલની બોલિંગમાં આક્રમક શોટ્સ રમ્યા હતા તે બાબતે ચહલે જણાવ્યું કે, હું પૂરન સામે સ્પર્ધાનો આનંદ ઉઠાવું છું. મે અનેક વખત તેની વિકેટ ઝડપી છે અને તેણે પણ મારી બોલિંગમાં છગ્ગા ફટકાર્યા છે. મેદાનમાં બધા જ જીતવા માટે રમે છે. અગાઉના કેપ્ટન અને વર્તમાન કેપ્ટન સાથે કેવો તાલમેલ છે તે અંગે ચહલે ઉમેર્યું કે દરેક સુકાનીએ મને સ્વતંત્રતા આપી છે. અગાઉ એમ એસ ધોની, વિરાટ, રોહિત તમામ સાથે સારો અનુભવ રહ્યો અને હાર્દિક સાથે પણ હું તે મુજબ જ વર્તન કરું છું. હાર્દિક પણ બોલર્સને પુરતી સ્વતંત્રતા આપે છે.