૨૨મી ડિસેમ્બરે શાહરૂખ ખાનની ‘ડંકી’ અને અલ્લુ અર્જુનની ‘પુષ્પા ૨’ વચ્ચે ટક્કર થશે

(GNS),26

સાઉથના સુપરસ્ટાર અલ્લુ અર્જુનની ‘પુષ્પા’ને બોક્સઓફિસ પર મળેલી સફળતાના પગલે ‘પુષ્પા 2’ના ધમાકેદાર આગમનની તૈયારી થઈચૂકી છે. પુષ્પારાજના રોલમાં અલ્લુ અર્જુનનો ડાયગોલ ‘ઝુકેગા નહીં’ ઝડપથી લોકપ્રિય થયો હતો અને તેના પર હજારો મીમ્સ પણ બની હતી.

રીલ લાઈફની જેમ રીયલ લાઈફમાં પણ ‘પુષ્પા’એ પોતાના આ સદાબહાર ડાયલોગને સાર્થક કરી બતાવ્યો છે. ૨૨મી ડિસેમ્બરે શાહરૂખ ખાનની ‘ડંકી’ રિલીઝ થઈ રહી છે ત્યારે તેનો મુકાબલો કરવા ‘પુષ્પા 2’નું આગમન નિર્ધારિત થયું છે.

પાછલા મહિને ‘પુષ્પા: ધ રુલ’નું ટીઝર રિલીઝ થયું હતું. ફિલ્મમાં પુષ્પાના એક્શન પેક્ડ અંદાજને જોયા બાદ રિલીઝ ડેટ અંગે અટકળો થઈ રહી હતી. હવે ૪૦૦ કરોડની આ ફિલ્મને ૨૨ ડિસેમ્બરે રિલીઝ કરવાની તૈયારીઓ થઈ રહી છે.

પુષ્પા: ધ રાઈઝમાં લીડ રોલ કરનારા અલ્લુ અર્જુન અને રશ્મિકા મંદાનાને સીક્વલમાં પણ યથાવત રખાયા છે. પોલીસ ઓફિસર ફહાદ ફાસિલનો રોલ પણ યથાવત રખાયો છે. પહેલી ફિલ્મે બોક્સઓફિસ પર રૂ.૩૦૦ કરોડનું કલેક્શન મેળવ્યું હતું.

ઓછા બજેટમાં બનેલી પુષ્પા: ધ રાઈઝને વધારે ભવ્ય અને રોમાંચક સ્વરૂપે ‘પુષ્પા: દ રુલ’માં રજૂ કરવામાં આવશે. સીક્વલમાં એક્શન સીક્વન્સ, વીએફએક્સ પર તોતિંગ ખર્ચ કરવામાં આવ્યો છે અને સ્ટાર કાસ્ટમાં પણ બોલિવૂડના સ્ટાર્સને ઉમેરવામાં આવ્યા છે.

રિપોર્ટ્સ મુજબ, સરપ્રાઈઝ એલિમેન્ટમાં રણવીરસિંહ પણ જોડાયા છે. તેઓ પોલીસ ઓફિસરનો રોલ કરવાના છે. અલ્લુ અર્જુનનો પણ આ ફિલ્મમાં નવો અવતાર છે. ટીઝર મુજબ, પોલીસ સાથે અથડામણમાં પુષ્પારાજ મૃત્યુ પામ્યો હોવાનું કહેવાય છે, પણ પુષ્પા જીવિત છે અને તેનો વીડિયો બહાર આવે છે.

પુષ્પા અને પોલીસની આ અથડામણને રણવીર સિંહ વધારે અસરકાર બનાવશે. અલ્લુ અર્જુને તાજેતરમાં ડાયરેક્ટર આદિત્ય ધરની ફિલ્મ ‘ઈમમોર્ટલ અશ્વત્થામા’ માટે પણ વાતચીત શરૂ કરી છે. અલ્લુને સ્ક્રિપ્ટ પસંદ આવી છે, પરંતુ આખરી નિર્ણય હજુ લેવાયો નથી.

આ ફિલ્મ પણ મોટા બજેટમાં બની રહી છે. ‘પુષ્પા 2’ની રિલીઝ બાદ તેનું શૂટિંગ શરૂ થઈ શકે છે. અલ્લુ અર્જુન પાસે આ સિવાય પણ પાન ઈન્ડિયા રિલીઝ માટે મોટા બજેટની ફિલ્મો છે અને અલ્લુનું કોન્ફિડન્સ લેવલ પર વધેલું છે. તેની સીધી અસર ફિલ્મની રિલીઝ ડેટ પર જોવા મળે છે.

રાજકુમાર હિરાણીએ શાહરૂખ ખાન સાથે બનાવેલી ફિલ્મ ‘ડંકી’ ૨૨ ડિસેમ્બરે રિલીઝ થવાની છે. ‘પઠાણ’ની સફળતા સાથે શાહરૂખ ખાને ફરી એકવાર બોક્સઓફિસ પર દબદબો પુરવાર કર્યો છે.

શાહરૂખની ફિલ્મો સામે ટક્કર લેવાનું બોલિવૂડ ટાળી રહ્યું છે ત્યારે સુકુમારના ડાયરેક્શનમાં બનેલી ‘પુષ્પા: ધ રુલ’ને પણ એ જ દિવસે રિલીઝ કરવાનો નિર્ણય લેવાયો છે.