ભારતીય વિદ્યાર્થીઓ હવે અભ્યાસ માટે કેનેડા જવા નથી માંગતા

સ્ટડી પરમિટ માટે ભારતમાંથી અરજીમાં 40 ટકા ઘટાડો થયો

(જી.એન.એસ),તા.૦૯

ભારત અને કેનેડા વચ્ચે ચાલી રહેલા રાજદ્વારી વિવાદની અસર કેનેડા જતા ભારતીય વિદ્યાર્થીઓ પર પડી છે. આ વર્ષના છ મહિનામાં કેનેડામાં અભ્યાસ માટે અરજી કરનારા ભારતીય વિદ્યાર્થીઓની સંખ્યામાં ભારે ઘટાડો થયો છે. જુલાઈ અને ઓક્ટોબર વચ્ચે ભારતમાંથી નવી સ્ટડી પરમિટ માટેની અરજીઓની સંખ્યા ગયા વર્ષના કુલ 145,881 થી ઘટીને 2023ના સમાન સમયગાળામાં માત્ર 86,562 થઈ ગઈ છે, જે લગભગ 40% નો ઘટાડો છે.. હિન્દુસ્તાન ટાઈમ્સના રિપાર્ટ મુજબ ઘટતી અરજી નંબરોની જાણ સૌપ્રથમ આઉટલેટ બેટર ડવેલિંગ દ્વારા કરવામાં આવી હતી, જેમાં કહેવામાં આવ્યું હતું કે કેનેડામાં આંતરરાષ્ટ્રીય વિદ્યાર્થીઓના શોષણના તાજેતરના અસંખ્ય કિસ્સાઓ નોંધાયા છે, જેના કારણે કેનેડામાં અભ્યાસ માટે અરજીઓમાં ભારતીય વિદ્યાર્થીઓની સંખ્યા ઘટાડો થયો છે. મોટાભાગના આંતરરાષ્ટ્રીય વિદ્યાર્થીઓએ કેનેડામાં જે મુશ્કેલીઓનો સામનો કરવો પડી રહ્યો છે તેના વિશે ભૂતકાળમાં સોશિયલ મીડિયા પર પોસ્ટ કરી છે, તેમની પોસ્ટની અસર પણ જોવા મળી રહી છે…

આ પહેલા ઓગસ્ટની શરૂઆતમાં કેનેડાના હાઉસિંગ, ઈન્ફ્રાસ્ટ્રક્ચર અને સમુદાયના પ્રધાન સીન ફ્રેઝરે કહ્યું હતું કે આપણે દેશમાં પ્રવેશ મેળવનારા આંતરરાષ્ટ્રીય વિદ્યાર્થીઓની સંખ્યા પર મર્યાદા નક્કી કરવાનું વિચારવું જોઈએ. ઉલ્લેખનીય છે કે કેનેડા હાલમાં કટોકટીનો સામનો કરી રહ્યું છે. અહીં વસ્તી ઘણી છે પરંતુ રહેવા માટે મકાનો ઓછા છે, જેના કારણે મકાનોની કિંમતો ઘણી વધી ગઈ છે. આવામાં અહીં ભણવા જતા વિદ્યાર્થીઓને મુશ્કેલીનો સામનો કરવો પડી રહ્યો છે.. આઈઆરસીસી એટલે કે ઈમિગ્રેશન, રેફ્યુજીસ એન્ડ સિટીઝનશિપ કેનેડા મુજબ વર્ષ 2022માં 3 લાખ 63 હજાર 541 ભારતીય વિદ્યાર્થીઓએ અરજી કરી હતી, જે 2021ના 2 લાખ 36 હજાર 77ના આંકડા કરતાં વધુ હતી. ઓક્ટોબર 2023 સુધીમાં 2 લાખ 61 હજાર 310 ભારતીય વિદ્યાર્થીઓએ અરજી કરી છે. જે સ્પષ્ટપણે દર્શાવે છે કે અરજદારોની સંખ્યામાં ભારે ઘટાડો થયો છે. સૌથી રસપ્રદ વાત એ છે કે કોવિડ-19 રોગચાળા દરમિયાન પણ ભારતીય વિદ્યાર્થીઓની અરજીઓની સંખ્યામાં એટલો ઘટાડો થયો નથી.