પાકિસ્તાનની પ્રથમ શ્રેણીમાં કેપ્ટન તરીકે શાહીન આફ્રિદીની શરૂઆત બહુ સારી રહી નથી

(જી.એન.એસ),તા.૧૨

પાકિસ્તાને T20 વર્લ્ડ કપની તૈયારીઓ શરૂ કરી દીધી છે. ન્યુઝીલેન્ડ વિરૂદ્ધ પાંચ મેચની T20 શ્રેણી શુક્રવારથી શરૂ થઈ છે અને પાકિસ્તાની ટીમે તેની સાથે ઘણા પ્રયોગો પણ શરૂ કર્યા છે. ફાસ્ટ બોલર શાહીન શાહ આફ્રિદીની કપ્તાનીમાં પાકિસ્તાનની આ પ્રથમ શ્રેણી છે, પરંતુ કેપ્ટન તરીકે શાહીનની શરૂઆત બહુ સારી રહી નથી. શાહીન આફ્રિદીએ એક ઓવરમાં 24 રન આપ્યા હતા. ખાસ વાત એ હતી કે ન્યુઝીલેન્ડના બેટ્સમેન ફિન એલને શાહીન આફ્રિદીને સતત પાંચ બોલ પર પાંચ બાઉન્ડ્રી ફટકારી હતી અને એક રીતે આ તેની કારકિર્દીની સૌથી મોંઘી ઓવર પણ રહી હતી. ઈનિંગની ત્રીજી ઓવરમાં જ શાહીન આફ્રિદી સાથે આવું થયું હતું.

ફિન એલને ન્યૂઝીલેન્ડની ઈનિંગ્સની ત્રીજી ઓવરમાં શાહીન આફ્રિદી પર બેટથી જોરદાર એટેક કર્યો હતો. તેણે આ ઓવરમાં 2 છગ્ગા, ત્રણ ચોગ્ગા ફટકાર્યા અને કુલ 24 રન ફટકાર્યા હતા. આ દરમિયાન ફિન એલને શાહીન આફ્રિદીના બોલ પર એક હાથે સિક્સર પણ ફટકારી હતી. તમને જણાવી દઈએ કે શાહીન આફ્રિદી પહેલીવાર T20 ક્રિકેટમાં પાકિસ્તાનની કેપ્ટનશીપ કરી રહ્યો છે અને હવે ટીમ તેમના નેતૃત્વમાં T20 વર્લ્ડ કપ રમવા માટે તૈયાર થઈ રહી છે. ન્યુઝીલેન્ડ સામેની T20 સિરીઝ પાકિસ્તાનની તૈયારીનો પહેલો તબક્કો છે, જોવાનું એ રહે છે કે પાકિસ્તાન આ ટેસ્ટમાં ક્યાં સુધી પાસ થાય છે. જો આ મેચમાં ન્યુઝીલેન્ડની વાત કરીએ તો તેમની તરફથી કેપ્ટન કેન વિલિયમસને 42 બોલમાં 57 રન અને ડિરેલ મિશેલે માત્ર 22 બોલમાં ફિફ્ટી ફટકારીને કુલ 61 રન બનાવ્યા હતા. ન્યુઝીલેન્ડે આ ઈનિંગમાં 226/8 રન બનાવ્યા હતા અને પહેલી જ મેચમાં પાકિસ્તાનને મુશ્કેલ પડકાર આપ્યો હતો.