જાપાનના મૂન મિશન સ્નાઈપરે ચંદ્ર પર સફળતાપૂર્વક લેન્ડિંગ કર્યું

(જી.એન.એસ),તા.૨૦

જાપાનના મૂન મિશન સ્નાઈપર ચંદ્રની સપાટી પર સફળતાપૂર્વક ઉતરાણ કર્યું છે. જાપાનની સ્પેસ એજન્સી JAXA એ ગયા વર્ષે 7 સપ્ટેમ્બરે ચંદ્ર પર તેના સ્નાઈપર મોકલ્યા હતા. 4 મહિનાથી વધુની મુસાફરી પછી, આ મૂન સ્નાઈપર સ્લિમ મિશનના ભાગરૂપે ચંદ્ર પર ઉતર્યું છે. જાપાન ચંદ્ર પર પહોંચનાર પાંચમો દેશ બની ગયો છે. ભારતના સફળ ચંદ્રયાન મિશન બાદ જાપાને અવકાશમાં ઈતિહાસ રચ્યો છે. જાપાનની સ્પેસ એજન્સી JAXAએ કહ્યું છે કે ચંદ્રની તપાસ માટે તેનું સ્માર્ટ લેન્ડર ચંદ્રની સપાટી પર ઉતરી ગયું છે. આ જાપાની સ્નાઈપર 25 ડિસેમ્બરે ચંદ્રની ભ્રમણકક્ષામાં પહોંચ્યો હતો. ત્યારથી તે ચંદ્રની સપાટી તરફ આગળ વધી રહ્યું હતું.  

આ લેન્ડરનું વજન 200 કિલો છે. લંબાઈ 2.4 મીટર અને પહોળાઈ 2.7 મીટર છે. તે રડાર, લેસર રેન્જ ફાઈન્ડર અને વિઝન આધારિત નેવિગેશન સિસ્ટમથી સજ્જ છે. તેમાં લગાવવામાં આવેલા કેમેરા ચંદ્ર પર હાજર ખડકોની ખૂબ જ સ્પષ્ટ તસવીરો લેશે. તેની સાથે તેમાં લુનર એક્સપ્લોરેશન વ્હીકલ અને લુનર રોબોટ પણ છે. જાપાનની સ્પેસ એજન્સીના જણાવ્યા અનુસાર, પિન પોઈન્ટ લેન્ડિંગ ટેક્નોલોજી ચંદ્ર સિવાયના અન્ય ગ્રહો પર લેન્ડિંગની મંજૂરી આપશે. સ્લિમ લેન્ડર લેન્ડિંગ સાઇટને લક્ષ્ય બનાવશે જે 100 મીટરની આસપાસ છે.   

જાપાને તેનું મૂન લેન્ડર એવા સમયે લેન્ડ કર્યું છે જ્યારે અમેરિકાનું પેરેગ્રીન લેન્ડર લોન્ચિંગ પછી નિષ્ફળ ગયું હતું. જાપાન પહેલા, માત્ર ચાર દેશો – રશિયા, અમેરિકા, ચીન અને ભારત – ચંદ્ર પર સોફ્ટ લેન્ડિંગ કરી શક્યા છે. જાપાનની સ્પેસ એજન્સી આ પહેલા પણ બે વખત નાના લઘુગ્રહો પર ઉતરવામાં સફળ રહી હતી પરંતુ આ વખતે તેને ચંદ્ર પર ઉતરવામાં સફળતા મળી છે. જાપાને ગયા વર્ષે પણ ચંદ્ર પર લેન્ડર મોકલ્યું હતું પરંતુ તે સફળ થયું ન હતું. તે નવેમ્બરમાં ઉતરવાનું હતું પરંતુ જાપાનનો તેના ચંદ્ર લેન્ડર સાથેનો સંપર્ક તૂટી ગયો. આ પછી, હાકુટો-આર મિશન લેન્ડરને ચંદ્ર પર મોકલવામાં આવ્યું હતું પરંતુ તે પણ ચંદ્ર પર ક્રેશ થયું હતું.