ગાંધીનગર જિલ્લાના ઇ-શ્રમ કાર્ડધારકોને નવીન રેશનકાર્ડ આપવામાં આવશે

(G.N.S) dt. 18

ગાંધીનગર,

રેશનકાર્ડ ઉપલબ્ધ હોય તેવા પાત્રતા ધરાવતા ઇ-શ્રમ કાર્ડધારકોનો એન.એફ.એસ.એ. યોજના હેઠળ કરવામાં આવશે સમાવેશ

ભારત સરકાર દ્વારા અસંગઠિત શ્રમયોગી સુરક્ષા અધિનિયમ અંતર્ગત શ્રમયોગીઓની નોધણી કરીને તેઓને રાજય સરકાર મારફતે ઈ-શ્રમ કાર્ડ આપવામાં આવે છે. જે અંતર્ગત તેઓને રેશનકાર્ડ આપવાની જોગવાઈ કરવામાં આવી છે. જેથી સમગ્ર ગાંધીનગર જિલ્લામાં ઈ-શ્રમ કાર્ડ ધરાવનાર નાગરિકો પાસે જો રેશનકાર્ડ ન હોય તો તેઓ નજીકની મામલતદાર કચેરીનો સંપર્ક કરી શકશે. વધુમાં જિલ્લાની તમામ મામલતદાર કચેરીઓ દ્વારા ઈ-શ્રમ કાર્ડધારકોનો સામેથી સંપર્ક કરીને માહિતી પણ મેળવવામાં આવી રહી છે.

ગાંધીનગરના જિલ્લા પુરવઠા અધિકારીશ્રીની યાદીમાં જણાવ્યા અનુસાર જે ઈ-શ્રમ કાર્ડધારકો પાસે હાલ રેશનકાર્ડ ઉપલબ્ધ છે તેઓએ પણ નજીકની મામલતદાર કચેરીની પુરવઠા શાખામાં તેઓના રેશનકાર્ડમાં એન.એફ.એસ.એ.નો લાભ મેળવવા અરજી કરી શકે છે. પાત્રતા ધરાવતા ઈ-શ્રમધારકોનો એન.એફ.એસ.એ. યોજના હેઠળ સમાવેશ કરવામાં આવશે. આ માટે ગાંધીનગરના જિલ્લા પુરવઠા અધિકારીશ્રી દ્વારા ગાંધીનગર જિલ્લાના તમામ ઈ-શ્રમકાર્ડ ધરાવતા નાગરિકોને નોંધ લેવા જણાવવામાં આવે છે તેમજ વધુ માહિતી માટે સંબંધિત તાલુકાની મામલતદાર કચેરીનો સંપર્ક કરવા જણાવવામાં આવે છે.