ઉમિયા આર્ટસ એન્ડ કોમર્સ ગર્લ્સ કોલેજની વિદ્યાર્થીનીઓ દ્વારા ‘મતદાન જાગૃતિ’ અંગે રેલી યોજાઈ

*યુવા મતદારોમાં મતદાન જાગૃતિ લાવવાના હેતુથી અમદાવાદ જિલ્લા ચૂંટણી તંત્રના માર્ગદર્શનમાં કરાયું આયોજન

પ્રથમ વખત મતદાન કરનાર વિદ્યાર્થીનીઓએ ‘મતદાન જાગૃતિ’ અંગેના વિવિધ પોસ્ટર્સ અને બેનરો સાથે રેલી યોજી

(જી.એન.એસ),તા.૦૨

અમદાવાદ,

શહેરની ઉમિયા આર્ટસ એન્ડ કોમર્સ ગર્લ્સ કોલેજ ખાતે અમદાવાદ જિલ્લા ચૂંટણી તંત્રના માર્ગદર્શનમાં આગામી લોકસભા ચૂંટણી સંદર્ભે સ્વીપ એક્ટિવિટી અંતર્ગત યુવા મતદારોમાં મતદાન અંગે જાગૃતિ લાવવા અને અચૂક મતદાનના શપથ લેવડાવવા મતદાન જાગૃતિ રેલીનું આયોજન કરવામાં આવ્યું હતું.

આ રેલીમાં તમામ વિદ્યાર્થીનીઓએ મતદાન જાગૃતિ અંગેના વિવિધ બેનરો જેવા કે, ‘દસ મિનિટ દેશ માટે’, ‘વોટ ફોર સ્યોર’, ‘ચુનાવ કા પર્વ, દેશ કા ગર્વ’ જેવાં વિવિધ સૂત્રો દ્વારા લોકોને માહિતગાર કર્યા હતા.

ઉમિયા આર્ટસ એન્ડ કોમર્સ ગર્લ્સ કોલેજના પ્રથમ વખત મતદાન કરનાર વિદ્યાર્થિનીઓ દ્વારા આ રેલી યોજવામાં આવી હતી.

આ રેલી બાદ મતદાન જાગૃતિમાં સક્રિય ભાગીદારી વધારવા એક ઓરીએન્ટેશન યોજાયું હતું. જેમાં ભારતના ચૂંટણી પંચના નિર્દેશાનુસાર વિદ્યાર્થિનીઓને પ્રેઝન્ટેશન દ્વારા ચૂંટણીલક્ષી અને મતદાન જેવી બાબતોની વિસ્તૃત જાણકારી પૂરી પાડવામાં આવી હતી. વધુમાં ચૂંટણી તંત્ર દ્વારા કરવામાં આવેલ તમામ વ્યવસ્થાઓ, હેલ્પલાઇન નંબર, સક્ષમ એપ્લિકેશન વિશે પણ માહિતી પૂરી પાડવામાં આવી હતી.

કાર્યક્રમના અંતે પ્રથમ વખત મતદાન કરનાર તમામ વિદ્યાર્થીનીઓએ દેશહિતમાં અચૂક મતદાન કરવાના શપથ લીધા હતા.

અત્રે ઉલ્લેખનીય છે કે, અમદાવાદ જિલ્લા કલેકટર કચેરીના માર્ગદર્શન હેઠળ મતદાન જાગૃતિ અંગેના નિરંતર વિવિધ કાર્યક્રમો યોજાઈ રહ્યા છે. આ ઉપરાંત શહેર જિલ્લાની વિવિધ શૈક્ષણિક સંકુલમાં પણ યુવાનોમાં મતદાનની જાગૃતિ વધે તેવા કાર્યક્રમોનું આયોજન કરાઇ રહ્યું છે.