ખાણ મંત્રાલયે બેંગલુરુમાં ગ્રેનાઈટ અને માર્બલ માઈનિંગ પર વર્કશોપનું આયોજન કર્યું

(જી.એન.એસ) તા. 30

બેંગલુરુ,

ખાણ મંત્રાલયે બેંગલુરુમાં ગ્રેનાઈટ અને માર્બલ માઈનિંગ પર એક વર્કશોપનું આયોજન કર્યું હતું. ભારત સરકારના ખાણ મંત્રાલયના સચિવ શ્રી. વીએલ કાંતા રાવે વર્કશોપના ઉદ્ઘાટન સત્રને સંબોધિત કર્યું. આ પ્રસંગે કર્ણાટક સરકારના અધિક મુખ્ય સચિવ અને વિકાસ કમિશનર ડૉ. શાલિની રજનીશે મુખ્ય વક્તવ્ય આપ્યું હતું. આ વર્કશોપમાં ભારત સરકારના ખાણ મંત્રાલયના સંયુક્ત સચિવ ડો. વીણા કુમારી ડી, કર્ણાટક સરકારના ખાણ અને ભૂસ્તરશાસ્ત્ર શ્રી રિચર્ડ વિન્સેન્ટ, જીઓલોજિકલ સર્વે ઓફ ઈન્ડિયા બેંગલુરુના વરિષ્ઠ અધિકારીઓ; આંધ્ર પ્રદેશ, કર્ણાટક, મધ્ય પ્રદેશ, તમિલનાડુના રાજ્ય ખાણ અને ભૂસ્તર વિજ્ઞાન નિર્દેશાલયો; પીએસયુ, ખાનગી ખાણ ઉદ્યોગના પ્રતિનિધિઓ, ખાણકામ સંગઠનો અને અન્ય હિસ્સેદારો સામેલ થયા હતા.

ખાણ મંત્રાલયના સચિવ શ્રી વી.એલ. કાંતા રાવે પોતાના સંબોધનમાં ભારત સરકાર દ્વારા ખાણકામ ક્ષેત્રે હાથ ધરાયેલી વિવિધ પહેલો અને સુધારાઓ પર ભાર મૂક્યો હતો. તેમણે રાજ્ય સરકારોને લઘુ ખનિજ ક્ષેત્રમાં પણ આવા સુધારા હાથ ધરવા વિનંતી કરી હતી. વધુમાં, તેમણે ધ્યાન દોર્યું હતું કે કેન્દ્ર સરકારે નેશનલ જીઓ-ડેટા રિપોઝીટરી પોર્ટલ દ્વારા તમામ હિસ્સેદારો માટે ડેટાની ઍક્સેસની સુવિધા આપતા સંશોધન અંગે વ્યાપક ડેટા અને માહિતી ઉપલબ્ધ કરાવી છે. કેન્દ્રીય એજન્સીઓ પાસેથી એકત્ર કરાયેલા ડેટા દ્વારા સંચાલિત આ પહેલનો હેતુ ખાણકામ ક્ષેત્રમાં પારદર્શિતા અને કાર્યક્ષમતા વધારવાનો છે.

શ્રી વી.એલ. કાંતા રાવે, લઘુ ખનિજ ક્ષેત્રમાં વ્યાપકપણે સુધાર લાવવા માટે કેન્દ્ર અને રાજ્ય સરકારો વચ્ચે સહયોગી પહેલ કરવાની હાકલ કરી હતી. તેમણે ધ્યાન દોર્યું કે વર્કશોપ એક મંથન સત્ર તરીકે કામ કરે છે જ્યાં ઉદ્યોગના પ્રતિનિધિઓ અને રાજ્ય સરકારો ઉકેલો શોધે છે.

કર્ણાટક સરકારના અધિક મુખ્ય સચિવ અને વિકાસ કમિશનર, ડૉ. શાલિની રજનીશે તેમના મુખ્ય વક્તવ્યમાં ગ્રેનાઈટ અને માર્બલ ખાણ ક્ષેત્રે વહીવટી, તકનીકી અને અન્ય સમસ્યાઓના ઉકેલો શોધવા માટે સરકાર અને ઉદ્યોગ વચ્ચે સહયોગના મહત્વ પર ભાર મૂક્યો હતો. તેમણે ભારપૂર્વક જણાવ્યું હતું કે ખાણકામ સહિતની કોઈપણ આર્થિક પ્રવૃત્તિ ટકાઉ હોવી જોઈએ. ડો. શાલિનીએ સેક્ટરના પડકારોને રચનાત્મક રીતે સંબોધવા માટે સ્ટાર્ટઅપ વિચારો અને નવીન યોગદાનને આવકાર્યું હતું અને ખાણકામ ક્ષેત્રના નિર્ણાયક ક્ષેત્રોનું સંચાલન કરવા, પારદર્શિતા સુનિશ્ચિત કરવા અને ફરિયાદો ઘટાડવા માટે આઈટી પ્લેટફોર્મના ઉપયોગ પર ભાર મૂક્યો હતો.

ઉદ્ઘાટન સત્ર પછી, વિવિધ હિતધારકોએ ગ્રેનાઈટ માઈનિંગ અને માર્બલ માઈનિંગના મુદ્દાઓ પર રજૂઆતો કરી. ત્યારપછી, કર્ણાટક, રાજસ્થાન, આંધ્રપ્રદેશ અને તેલંગાણાની રાજ્ય સરકારોએ ઉદ્યોગ સંગઠન દ્વારા ઉઠાવેલા મુદ્દાઓ પર પ્રતિભાવ આપતા પ્રેઝન્ટેશન આપ્યા અને ગ્રેનાઈટ અને માર્બલ મિનરલ્સના નિયમન પરની શ્રેષ્ઠ પદ્ધતિઓ પર પણ પ્રકાશ પાડ્યો.

વાણિજ્ય મંત્રાલયના નેશનલ કાઉન્સિલ ફોર સિમેન્ટ એન્ડ બિલ્ડીંગ મટિરિયલ ડીપીઆઈઆઈટી ના સંયુક્ત નિયામક ડૉ. બી પાંડુરંગા રાવ દ્વારા ભારતમાં સિમેન્ટ અને બાંધકામ ક્ષેત્રે ગ્રેનાઈટ અને માર્બલ ઉદ્યોગની ભૂમિકા અંગે એક પ્રેઝન્ટેશન પણ કરવામાં આવ્યું હતું. આઈબીએમના મુખ્ય ખાણ નિયંત્રક શ્રી પીયૂષ નારાયણ શર્માએ ખાણ ક્ષેત્રે ટકાઉ વિકાસ માળખા અને ખાણોના સ્ટાર રેટિંગ પર પ્રેઝન્ટેશન આપ્યું હતું.