ટાટા ગ્રુપની કંપની ટાટા કેમિકલ્સને આવકવેરા વિભાગ તરફથી નોટિસ મળી

(જી.એન.એસ),તા.૨૩

નવીદિલ્હી,

ટાટા ગ્રુપની કંપની ટાટા કેમિકલ્સને આવકવેરા વિભાગ તરફથી નોટિસ મળી છે. આવકવેરા વિભાગના નિયમોના ઉલ્લંઘન બદલ ટાટા કેમિકલ્સ પર 103.63 કરોડ રૂપિયાનો દંડ ફટકારવામાં આવ્યો છે. ટાટા કેમિકલ્સે શેરબજારને કરેલી વાતચીતમાં જણાવ્યું હતું કે તેને આવકવેરા વિભાગના નેશનલ ફેસલેસ એસેસમેન્ટ સેન્ટર તરફથી ઓર્ડર મળ્યો છે. આવકવેરા વિભાગના આ આદેશમાં, કલમ 36 (1) હેઠળ વ્યાજની મંજૂરી ન આપવા બદલ આવકવેરા કાયદાની કલમ 270 A (3) હેઠળ 103.63 કરોડ રૂપિયાનો દંડ ફટકારવામાં આવ્યો છે. આ નોટિસ અંગે ટાટા ગ્રૂપે કહ્યું છે કે તેના વકીલની સલાહ લીધા બાદ તે આ આદેશ વિરુદ્ધ નેશનલ ફેસલેસ અપીલ સેન્ટર સમક્ષ અપીલ કરવાની યોજના બનાવી રહ્યું છે. કંપનીએ કહ્યું કે તેને અપીલકર્તા સત્તાવાળાઓ તરફથી અનુકૂળ આદેશની અપેક્ષા છે.

કંપનીએ નેશનલ સ્ટોક એક્સચેન્જને નોટિસ મોકલીને આ માહિતી આપી છે જેમાં કહેવામાં આવ્યું છે કે આવકવેરા વિભાગ દ્વારા તેના પર 103,63,48,806 કરોડ રૂપિયાનો દંડ ફટકારવામાં આવ્યો છે. કંપનીને આશા છે કે ઓથોરિટી તેમના પક્ષમાં ચુકાદો આપશે. આ આદેશ છતાં ટાટા કેમિકલ્સના શેર પર કોઈ ખાસ અસર જોવા મળી નથી. શુક્રવારે બપોરે 13.40 વાગ્યે ટાટા કેમિકલ્સનો શેર 2.14 ટકાના વધારા સાથે રૂ. 1057 પર ટ્રેડ થતો જોવા મળી રહ્યો છે. તાજેતરમાં ટાટા સન્સે IPO લાવવાની જાહેરાત કરી હતી. આ સમાચાર બાદ ટાટા કેમિકલ્સના શેરમાં ઉછાળો જોવા મળી રહ્યો છે. છેલ્લા એક મહિનામાં ટાટા કેમિકલ્સના શેરમાં 7.80 ટકાનો વધારો નોંધાયો છે. એક મહિના પહેલા આ શેરની કિંમત 980.55 રૂપિયા હતી, જે હવે વધીને લગભગ 1057 રૂપિયા થઈ ગઈ છે. ટાટા સન્સ માર્કેટમાં લિસ્ટ થવાના સમાચાર ચર્ચામાં છે. આરબીઆઈની માર્ગદર્શિકા અનુસાર, ટાટા સન્સને વર્ષ 2025 સુધીમાં શેરબજારમાં લિસ્ટેડ થવું પડશે.