મોહાલીમાં રમાયેલી પ્રથમ T20 મેચમાં રોહિત શર્માએ સાથી ખેલાડીની ભૂલને કારણે રન આઉટ થઈ પાછું ફરવું પડ્યું

(જી.એન.એસ),તા.૧૫

ભારત અને અફઘાનિસ્તાન વચ્ચે ચાલી રહેલી T20 શ્રેણી જો આગામી થોડા દિવસોમાં એક વસ્તુ માટે યાદ રાખવામાં આવશે, તો તે વિચિત્ર રન આઉટ હશે. મોહાલીમાં રમાયેલી પ્રથમ T20 મેચમાં ભારતીય કેપ્ટન રોહિત શર્માએ પોતાના સાથી ખેલાડીની ભૂલને કારણે રન આઉટ થતાં પરત ફરવું પડ્યું હતું અને પોતાનો ગુસ્સો ઠાલવ્યો હતો. હવે પછીની મેચમાં અફઘાનિસ્તાનના ખેલાડીઓએ પણ આ જ ભૂલનું પુનરાવર્તન કર્યું અને દર્શકોને સતત બીજી મેચમાં ડ્રામા જોવા મળ્યો.  મોહાલીમાં રમાયેલી પ્રથમ T20 મેચમાં જ્યારે ભારતીય ટીમ રનનો પીછો કરવા ઉતરી ત્યારે બધાની નજર કેપ્ટન રોહિત શર્મા પર હતી. રોહિત 14 મહિના પછી T20 ટીમમાં પરત ફર્યો હતો અને ચાહકો તેની પાસેથી મજબૂત ઈનિંગની આશા રાખતા હતા. રોહિતે લાંબો શોટ રમવાનો પ્રયાસ કર્યો પરંતુ સફળ ન થયો અને એક રન માટે દોડ્યો. પરંતુ શુભમન ગિલે તેની અવગણના કરી. રોહિત નોન-સ્ટ્રાઈકર છેડે પહોંચી ગયો હતો પરંતુ ગિલ ખસ્યો નહીં અને રોહિત રનઆઉટ થયો હતો.

શુભમન ગિલની ભૂલને કારણે રોહિતની વિકેટ પડી અને ત્યારથી તેની સતત ચર્ચા થતી રહી. ભાગ્યે જ કોઈએ વિચાર્યું હશે કે આગામી મેચમાં ફરીથી આવું કંઈક જોવા મળશે. જોકે આ વખતે અફઘાન ટીમ તેનો શિકાર બની હતી. નવીન ઉલ હક 20મી ઓવરના છેલ્લા બોલ પર સ્ટ્રાઈક પર હતો પરંતુ બોલ વાઈડ રહ્યો હતો. નોન-સ્ટ્રાઈક પર રહેલા મુજીબ ઉર રહેમાન એ આશામાં રન માટે દોડ્યા કે નવીન પણ તેને ટેકો આપશે પરંતુ એવું બન્યું નહીં.  નવીન તેની ક્રિઝ પર રહ્યો અને મુજીબ બીજી બાજુ પહોંચી ગયો. અર્શદીપે તેને સરળતાથી રન આઉટ કર્યો. જે બાદ છેલી મેચમાં રોહિત અને શુભમન ગિલના રન આઉટની યાદ અપાવી. જો કે આ પછી માત્ર છેલ્લો બોલ બાકી રહ્યો હતો પરંતુ તેમ છતાં નવીને તેની ટીમને કેટલાક રનનું નુકસાન પહોંચાડ્યું હતું. રનઆઉટ થતા પહેલા મુજીબે માત્ર 9 બોલમાં 21 રન બનાવ્યા હતા અને તે છેલ્લા બોલ પર ટીમ માટે કેટલાક વધુ રન બનાવી શક્યો હોત. છેલ્લા બોલ પર પણ નવીનને કારણે અન્ય એક ખેલાડી રન આઉટ થયો અને અફઘાન ટીમ 172 રનમાં સમેટાઈ ગઈ.