રાજકોટ મહાનગર પાલિકાના ફૂડ વિભાગ દ્વારા અખાદ્ય ફરસાણ અને મીઠાઈનાં વેપારીઓને ત્યાં સતત દરોડા

(GNS),04

હાલ શ્રાવણ માસ ચાલી રહ્યો છે અને જન્માષ્ટમીનો તહેવારને નજીક છે ત્યારે રાજકોટ મહાનગરપાલિકાનું ફૂડ વિભાગ પણ સતર્ક છે અને શ્રાવણ માસની શરૂઆતથી જ સતત દરોડા પાડીને અખાદ્ય ફરસાણ અને મીઠાઈ ઝડપીને તેનો નાશ કરી રહ્યા છે. શ્રાવણ માસની શરૂઆતથી અત્યાર સુધીમાં RMCના ફૂડ વિભાગ દ્વારા હજારો કિલો અખાદ્ય ફરસાણ અને મીઠાઈ ઝડપી પાડી છે.આ ફરસાણ લોકોના આરોગ્ય માટે ખૂબ જ જોખમી હોવાનો આરોગ્ય વિભાગની તપાસમાં ખુલાસો થયો છે. રાજકોટ મહાનગર પાલિકાના આરોગ્ય અધિકારી ડૉ.જયેશ વાકાણીએ જણાવ્યું હતું કે, દર વર્ષે શ્રાવણ માસ દરમિયાન મનપાનું આરોગ્ય વિભાગ RMCનું આરોગ્ય વિભાગ સતર્ક હોય છે. RMCના ફૂડ વિભાગે શ્રાવણ માસ દરમિયાન 200થી વધુ એકમોમાં દરોડા પાડી 14 હજાર 500 કિલો અખાદ્ય ફરસાણ અને મીઠાઈનો જથ્થો ઝડપી પાડયો અને સ્થળ પર જ તેનો નાશ કર્યો છે અને નોટિસ ફટકારવામાં આવી છે. ગઈકાલે જ શ્રી રામ ગૃહ ઉદ્યોગમાં દરોડા પાડીને 5500 કિલો અખાદ્ય ફરસાણ,મીઠાઈનો જથ્થો મળી આવ્યો આ ઉપરાંત દાઝિયુ તેલ અને ફરસાણમાં ધોવાનો સોડા વપરાતો હોવાનો ચોંકાવનારો ખુલાસો પણ થયો.

આ ઉપરાંત શ્રાવણ માસ દરમિયાન ફરાળી વાનગીઓમાં બિનફરાળી વસ્તુઓ પધરાવીને લોકોની આસ્થા સાથે ચેડાં કરતા વેપારીઓ સામે પણ કાર્યવાહી કરવામાં આવી છે. આ ઉપરાંત જન્માષ્ટમી દરમિયાન રેસકોર્સનો લોકમેળો અને શહેરમાં યોજાતા ખાનગી મેળાઓમાં પણ ફૂડ વિભાગ સતત ચેકિંગ કરશે અને જો અખાદ્ય અને બિનઆરોગ્યપ્રદ વસ્તુઓ મળશે તો કડક કાર્યવાહી કરવામાં આવશે. તેમજ TV9ના માધ્યમથી આ પ્રકારે લોકોના આરોગ્ય સાથે ચેડાં કરતા વેપારીઓને ચેતવણી આપી હતી કે તહેવારો દરમિયાન લોકોના આરોગ્ય સાથે ચેડાં ન કરે,નહિતર કડક કાર્યવાહી તેમના વિરુદ્ધ કરવામાં આવશે. ફૂડ વિભાગના દરોડામાં જોવા મળે છે કે જ્યારે જ્યારે અખાદ્ય જથ્થો ઝડપવામાં આવે ત્યારે ત્યારે ફૂડ વિભાગ દ્વારા તે જથ્થાનો સ્થળ પર નાશ કરીને જે તે એકમોને નોટિસ ફટકારવામાં આવે છે.જેથી બીજા જ દિવસથી આ પ્રકારના એકમો ફરીથી શરૂ થઈ જાય છે.પરંતુ આ કામગીરી પૂરતી હોય તેવુ નથી લાગી રહ્યું આ પ્રકારે લોકોના આરોગ્ય સાથે ગંભીર પ્રકારના ચેડાં કરતા વેપારીઓની દુકાન સીલ કરીને મોટો દંડ ફટકારવાની કામગીરી કરવાની જરૂર લાગી રહી છે.