બાંગ્લાદેશ સામેની પ્રથમ ટેસ્ટ મેચમાં કાગીસો રબાડાએ મુશ્ફિકર રહીમને બોલ્ડ કર્યો

(જી.એન.એસ),તા.21

દક્ષિણ આફ્રિકા,

કહેવાય છે કે રેકોર્ડ બનાવતાની સાથે જ તૂટી જવાના હોય છે અને દક્ષિણ આફ્રિકાના ફાસ્ટ બોલર કાગીસો રબાડાએ આ કહેવતને સાચી સાબિત કરી છે. કાગિસો રબાડાએ બાંગ્લાદેશ સામે ઢાકામાં રમાઈ રહેલી પ્રથમ ટેસ્ટ મેચમાં બીજી વિકેટ લેતાની સાથે જ ટેસ્ટ ક્રિકેટમાં 300 વિકેટ પૂરી કરી લીધી. મોટી વાત એ છે કે આ વિકેટ સાથે રબાડાએ વર્લ્ડ રેકોર્ડ પણ તોડ્યો હતો. કાગિસો રબાડા સૌથી ઓછા બોલમાં 300 વિકેટ ઝડપનાર બોલર પણ બન્યો હતો. રબાડાએ પાકિસ્તાનના ભૂતપૂર્વ ફાસ્ટ બોલર વકાર યુનિસનો રેકોર્ડ તોડ્યો છે. કાગિસો રબાડાએ 11,817 બોલમાં 300 વિકેટ પૂરી કરવાની સિદ્ધિ મેળવી હતી. આ પહેલા આ રેકોર્ડ વકારના નામે હતો, જેણે 12,602 બોલ ફેંકીને 300 ટેસ્ટ વિકેટ પૂરી કરી હતી. જ્યારે દક્ષિણ આફ્રિકાના ડેલ સ્ટેને 12,605 બોલમાં 300 ટેસ્ટ વિકેટ પૂરી કરી હતી.

રબાડા માત્ર 29 વર્ષનો છે અને આ ખેલાડીએ માત્ર 22.04ની બોલિંગ એવરેજ અને માત્ર 39.39ના સ્ટ્રાઈક રેટ સાથે 300 વિકેટ લેવાની સિદ્ધિ હાંસલ કરી છે. જો કે, જો ટેસ્ટ મેચની વાત કરીએ તો સૌથી ઓછી મેચોમાં 300 ટેસ્ટ વિકેટ લેવાનો રેકોર્ડ આર અશ્વિનના નામે છે. અશ્વિને માત્ર 54 ટેસ્ટ મેચમાં વિકેટની ત્રેવડી સદી ફટકારી હતી. ડેનિસ લિલીએ 56 મેચમાં અને મુથૈયા મુરલીધરને 58 મેચમાં આ સિદ્ધિ મેળવી હતી. દક્ષિણ આફ્રિકા માટે ડેલ સ્ટેને 61 ટેસ્ટમાં 300 ટેસ્ટ વિકેટ લેવાનો ચમત્કાર કર્યો છે. રબાડાએ પોતાની 65મી ટેસ્ટ મેચમાં આ કર્યું છે. કાગિસો રબાડા પાસે હવે પોતાના દેશના બે દિગ્ગજ ઝડપી બોલરોને હરાવવાનો મોકો છે. મોર્ને મોર્કેલના નામે 309 ટેસ્ટ વિકેટ છે જ્યારે ડોનાલ્ડના નામે 330 ટેસ્ટ વિકેટ છે. હવે રબાડા તેને જલ્દીથી પાછળ છોડી શકે છે. ડેલ સ્ટેને દક્ષિણ આફ્રિકા માટે સૌથી વધુ ટેસ્ટ વિકેટ લીધી છે. સ્ટેનના નામે 439 ટેસ્ટ વિકેટ છે.