(જી.એન.એસ)તા.30
કુલ્લૂ,
હિમાચલ પ્રદેશના કુલ્લૂમાં આવેલ મણિકર્ણ પાસે એક મોટી દુર્ઘટના ઘટી હતી જેમાં લેન્ડ સ્લાઇડ થતાં પહાડી રસ્તા પર એક મસમોટું વૃક્ષ અચાનક જ ગાડીઓ પર પડી જતાં અનેક લોકો દબાઈ ગયા હતા અને છ લોકોના મોત થયા હતા. આ દુર્ઘટનામાં અત્યાર સુધીમાં છ લોકોના નિધનની પુષ્ટિ થઈ છે જ્યારે ઘણા લોકો ગંભીર રૂપે ઈજાગ્રસ્ત થયા છે. હજુ સુધી મૃતકોની ઓળખ થઈ શકી નથી. પ્રત્યક્ષદર્શીઓ અનુસાર મણિકર્ણ ગુરુદ્વારાના સામેના રસ્તા પર વૃક્ષ પડી જતાં ટુરિસ્ટ તથા એક વેપારી નીચે દબાઈ ગયા હતા.
ઈજાગ્રસ્ત લોકોને સ્થાનિકોની મદદથી આસપાસની હોસ્પિટલોમાં સારવાર માટે દાખલ કરવામાં આવ્યા છે. આશંકા છે કે ભૂસ્ખલનના કારણે આ વૃક્ષ ગાડીઓ પર પડ્યું હોઈ શકે.
કુલ્લુના એડીએમ અશ્વિની કુમારના જણાવ્યા અનુસાર, આ અકસ્માતમાં 6 લોકોના મોત થયા છે. ઘણા લોકો ઘાયલ થયા છે. હાલમાં ઘટનાસ્થળે રાહત અને બચાવ કાર્ય શરૂ કરવામાં આવ્યું છે. તેમણે કહ્યું કે પોલીસ અને વહીવટીતંત્રની ટીમો ઘટનાસ્થળે હાજર છે.