ઉત્તર પ્રદેશના બહુચર્ચિત દિહુલી સામૂહિક નરસંહાર મામલે કોર્ટે 44 વર્ષ બાદ નિર્ણય સંભળાવ્યો
(જી.એન.એસ) તા. 18
લખનૌ,
44 વર્ષ બાદ ઉત્તર પ્રદેશમાં કોર્ટે બહુચર્ચિત દિહુલી સામૂહિક નરસંહાર મામલે 3 દોષિતોને સજા સંભળાવી છે. આ હિંસામાં 24 દલિત સમુદાયના લોકોની હત્યા કરવામાં આવી હતી.
કોર્ટે 24 લોકોની હત્યા મામલે 3 આરોપીઓને ફાંસીની સજા સંભળાવી છે અને 50-50 હજારનો દંડ પણ ફટકાર્યો છે. કોર્ટમાં સજા સાંભળતાની સાથે જ ત્રણેય આરોપીઓ ધ્રુસકે ધ્રુસકે રડવા લાગ્યા હતા. આ દરમિયાન કોર્ટ પરિસરમાં કડક સુરક્ષા વ્યવસ્થા કરવામાં આવી હતી. બીજી તરફ સરકારી વકીલ એડવોકેટ રોહિત શુક્લા (ADGC) એ કહ્યું કે આ નિર્ણય ન્યાયનો વિજય છે અને પીડિત પરિવારોને ન્યાય મળ્યો છે.
કોર્ટે રામસેવક, કપ્તાન સિંહ, રામપાલને મૃત્યુદંડની સજા ફટકારી છે. આ હત્યા કેસમાં 17 આરોપીઓમાંથી 13 લોકો મૃત્યુ પામ્યા છે. 1981માં મૈનપુરીના દિહુલી ગામમાં જાતીય હિંસામાં 24 દલિતો માર્યા ગયા હતા. આ કેસમાં ત્રણ આરોપીઓને દોષિત ઠેરવવામાં આવ્યા છે. સજાની તારીખ 18 માર્ચ, 2025 નક્કી કરવામાં આવી હતી, ત્યારબાદ આજે સજા સંભળાવવામાં આવી હતી. તત્કાલીન વડા પ્રધાન ઇન્દિરા ગાંધીએ સ્થળની મુલાકાત લીધી હતી.
18 નવેમ્બર 1981ના રોજ ફિરોઝાબાદના જસરાના દિહુલી ગામમાં જાતિ આધારિત હિંસામાં દલિત સમુદાયના 24 લોકો માર્યા ગયા હતા. આ કેસમાં લાયક સિંહે જસરાણા પોલીસ સ્ટેશનમાં રાધેશ્યામ ઉર્ફે રાધે, સંતોષ ચૌહાણ ઉર્ફે સંતોષ, રામ સેવક, રવિન્દ્ર સિંહ, રામપાલ સિંહ, વેદરામ, મિથુ, ભૂપ રામ, માણિક ચંદ્ર, લાતુરી, રામ સિંહ, ચુન્નીલાલ, હોરી લાલ, સોનપાલ, લાયક સિંહ, બનવારી, જગદીશ, રેવતી દેવી, ફૂલ દેવી, કેપ્ટન સિંહ, કામ રુદ્દીન, શ્યામ વીર, કુંવર પાલ અને લક્ષ્મી વિરુદ્ધ કેસ દાખલ કર્યો હતો.
ઉલ્લેખનીય છે કે, અગાઉ ઉત્તર પ્રદેશમાં દિહુલી ગામ મૈનપુરી જિલ્લામાં હતું. તેથી આ કેસ મૈનપુરી જિલ્લા કોર્ટમાં ચાલતો હતો. મૈનપુરીમાં આ માટેની કોર્ટ ન હોવાથી કેસ પ્રયાગરાજ ટ્રાન્સફર કરવામાં આવ્યો હતો. ત્યાં સુનાવણી પછી લગભગ 15 વર્ષ પહેલાં, તેને ફરીથી મૈનપુરી સ્પેશિયલ જજ રોબરી કોર્ટમાં મોકલવામાં આવ્યો. આ કેસમાં મોટાભાગના આરોપીઓનું મૃત્યુ થઈ ગયા છે.