હવે ભરતી પરીક્ષાઓમાં છેતરપિંડી અને અન્ય ગેરરીતિઓ કરનારની ખેર નથી

પબ્લિક એક્ઝામિનેશન (પ્રિવેન્શન ઓફ અનફેર મીન્સ) એક્ટ, 2024 અમલમાં આવ્યો 

(જી.એન.એસ) તા. 22

નવી દિલ્હી,

આપણા દેશમાં પેપર લીક વિરોધી કાયદો એટલે કે પબ્લિક એક્ઝામિનેશન (પ્રિવેન્શન ઓફ અનફેર મીન્સ) એક્ટ, 2024 અમલમાં આવ્યો છે. કેન્દ્રએ શુક્રવારે (21 જૂન) મધ્યરાત્રિએ તેનું જાહેરનામું બહાર પાડ્યું હતું. આ કાયદો ભરતી પરીક્ષાઓમાં છેતરપિંડી અને અન્ય ગેરરીતિઓને રોકવા માટે લાવવામાં આવ્યો છે. આ કાયદા હેઠળ, પેપર લીક કરવા અથવા ઉત્તરપત્ર સાથે ચેડા કરવા પર ઓછામાં ઓછી 3 વર્ષની જેલની સજા થશે. આને ₹10 લાખ સુધીના દંડ સાથે 5 વર્ષ સુધી લંબાવી શકાય છે. જો પરીક્ષા યોજવા માટે નિયુક્ત સેવા પ્રદાતા દોષિત ઠરશે તો તેને 1 કરોડ રૂપિયા સુધીનો દંડ ફટકારવામાં આવશે. જો સેવા પ્રદાતા ગેરકાયદેસર પ્રવૃત્તિઓમાં સંડોવાયેલ હશે, તો પરીક્ષાનો ખર્ચ તેની પાસેથી વસૂલવામાં આવશે.

આ વર્ષે 6 ફેબ્રુઆરીએ લોકસભા અને 9 ફેબ્રુઆરીના રોજ રાજ્યસભા દ્વારા જાહેર પરીક્ષા (અયોગ્ય માધ્યમો નિવારણ) અધિનિયમ પસાર કરવામાં આવ્યો હતો. રાષ્ટ્રપતિ દ્રૌપદી મુર્મુએ 12 ફેબ્રુઆરીએ બિલને મંજૂરી આપી અને તેને કાયદામાં ફેરવી દીધું.

આ કાયદો યુનિયન પબ્લિક સર્વિસ કમિશન (યુપીએસસી), સ્ટાફ સિલેક્શન કમિશન (એસએસસી), રેલવે ભરતી બોર્ડ (આરઆરબી), ઇન્સ્ટિટ્યૂટ ઑફ બેન્કિંગ પર્સનલ સિલેક્શન (આઇબીપીએસ) અને નેશનલ ટેસ્ટિંગ એજન્સી (એનટીએ) ની પરીક્ષાઓને આવરી લેશે. કેન્દ્રના તમામ મંત્રાલયો અને વિભાગોની ભરતી પરીક્ષાઓ પણ આ કાયદાના દાયરામાં હશે. આ અંતર્ગત તમામ ગુનાઓ કોગ્નિઝેબલ અને બિનજામીનપાત્ર હશે.

નીટ અને યુજીસી-નેટ જેવી પરીક્ષાઓમાં થતી ગેરરીતિઓ વચ્ચે આ કાયદો લાવવાના નિર્ણયને એક મોટું પગલું માનવામાં આવી રહ્યું છે. આ કાયદા પહેલા, કેન્દ્ર સરકાર અને તપાસ એજન્સીઓ પાસે પરીક્ષામાં ગેરરીતિ સંબંધિત ગુનાઓનો સામનો કરવા માટે કોઈ અલગ નક્કર કાયદો નહોતો. કેન્દ્ર સરકારે શુક્રવાર-શનિવાર (21-22 જૂન)ની રાત્રે પેપર લીક વિરોધી કાયદાને લઈને એક નોટિફિકેશન બહાર પાડી હતી. આ કાયદો સંગઠિત ટોળકી, માફિયાઓ અને આવી પ્રવૃત્તિઓમાં સંકળાયેલા લોકો પર કાર્યવાહી કરવા માટે લાવવામાં આવ્યો છે. આ સાથે જો સરકારી અધિકારીઓ પણ આમાં સંડોવાયેલા જોવા મળશે તો તેઓ પણ ગુનેગાર ગણાશે. જાહેર પરીક્ષા કે તેને લગતું કામ આપવામાં આવ્યું ન હોય તેવી કોઈપણ વ્યક્તિને પરીક્ષા કેન્દ્રમાં પ્રવેશ આપવામાં આવશે નહીં.