(જી.એન.એસ), તા. ૫ સૂરત
સૂરત રેલવે સ્ટેશન પર ગાંજો લઇ જવાઇ રહ્યો છે તેવી માહિતી પોલીસને મળતાં પોલીસે બાતમીવાળી જગ્યા પર પહોંચી તપાસ શરૂ કરી હતી. સૂરત સ્ટેશને પુરીથી ઓખા જતી ટ્રેનમાંથી રૂપિયા 4,17,100ની કિંમતનો 68 કિલો ગાંજો મળી આવ્યો હતો. પોલીસે ટ્રેનના ડબ્બામાં તપાસ કરતા ત્રણ મહિલા ગાંજો પોતાના વતનથી લાવી હોવાનું જણાતાં પોલીસે ત્રણેય મહિલાઓની ધરપકડ કરી હતી. આ ત્રણેય મહિલાઓ મૂળ ઓરિસ્સાની રહેવાસી છે. ગાંજાનું રેકેટ છેક ઓરિસ્સાથી સૂરત સુધી ચાલી રહ્યું છે. મામલે ઉચ્ચ અધિકારીઓ તપાસ કરે તો ગાંજાનો મોટા પાયે વેપલો બહાર આવે તેવી શક્યતા છે.
સૂરત રેલવે પોલીસે બાતમીને આધારે રેલવે સ્ટેશન પર સઘન પેટ્રોલિંગ હાથ ધર્યું હતું. તે દરમિયાન પોલીસને માહિતી મળી હતી કે, કેટલીક મહિલાઓ ટ્રેનમાં ગાંજો લાવી રહી છે. તેના આધારે પોલીસ વોચ ગોઠવી હતી. ત્યારે સૂરત રેલવે સ્ટેશન નજીક માલ્યવાડ પાસે ટ્રેનમાં ચેન પુલિંગ થતાં પોલીસ તાત્કાલિક દોડી ગઈ અને કેટલીક મહિલાઓ ટ્રેનમાંથી ગાંજો નીચે નાંખી રહી હતી. પોલીસે ત્રણ મહિલાઓની ધરપક્ડ કરી ગાંજા સાથેનો તમામ મુદામાલ જપ્ત કર્યો હતો.
રેલવે પોલીસે તમામ ગાંજો કબ્જે કરી પોલીસ સ્ટેશન લાવીને તેનો વજન કરતા કુલ 68 કિલો ગાંજો હોવાનું જાણવા મળ્યું હતું. જેની બજાર કિંમત 4 લાખથી વધુ થાય છે. હાલમાં સૂરત રેલવે પોલીસે પકડાયેલી ત્રણેય મહિલા સામે કાયદેસરની કાર્યવાહી કરી વધુ તપાસ હાથ ધરી છે.
આ ગાંજો સૂરત વડોદરા અને આજુબાજુના વિસ્તારોમાં સપ્લાય થતો હોવાનું પણ બહાર આવ્યું છે. જે ઓરિસ્સા અને ગંજામથી લાવવામાં આવે છે. અગાઉ પણ સૂરત સ્ટેશન પર મોટા પ્રમાણમાં ગાંજો પકડાયો છે. સૂરત પોલીસ દ્વારા બે ટીમ બનાવી સતત ટ્રેનમાં અને ટ્રેકની આજુ બાજુ પેટ્રોલિંગ કરવામાં આવી રહ્યું છે.
ઉલ્લેખનીય છે કે બે દિવસ અગાઉ પણ ટ્રેનમાંથી 72 કિલો ગાંજો ઝડપાયો હતો. તેવામાં ગાંજાની હેરાફેરી અટકાવવી પોલીસ માટે ચેલેંજ બની ગઈ છે.
This content is restricted to site members. If you are an existing user, please log in. New users may register below.
