રણજી ટ્રોફી ક્રિકેટ ટુર્નામેન્ટની ક્વાર્ટર ફાઇનલ મેચમાં સૌરાષ્ટ્ર ટીમનો ધબડકો

લેફ્ટ આર્મ સ્પિનર સાઈ કિશોરની બોલિંગ સામે સૌરાષ્ટ્ર 183માં આઉટ થઇ

(જી.એન.એસ),તા.૨૫

કોઇમ્બતુર,

ભારતીય ટીમ માટે ટી20 રમી ચૂકેલા લેફ્ટ આર્મ સ્પિનર સાઈ કિશોરે બોલિંગમાં તરખાટ મચાવતા શુક્રવારથી શરૂ થયેલી રણજી ટ્રોફી ક્રિકેટ ટુર્નામેન્ટની ક્વાર્ટર ફાઇનલ મેચમાં સૌરાષ્ટ્રની ટીમનો ધબડકો થયો હતો. તામિલનાડુ સામે કોઇમ્બતુર ખાતે શરૂ થયેલી મેચમાં સૌરાષ્ટ્રની ટીમ 183 રનમાં આઉટ થઈ ગઈ હતી. સૌરાષ્ટ્રની ટીમના કેપ્ટન જયદેવ ઉનડકટે ટોસ જીતીને પ્રથમ બેટિંગ કરવાનો નિર્ણય લીધા બાદ તેના ઓપનર હાર્વિક દેસાઈએ શાનદાર બેટિંગ કરી હતી પરંતુ તેને સામે છેડેથી જોઈએ તેટલો સહકાર સાંપડ્યો ન હતો. હાર્વિકે 185 બોલમાં એક સિક્સર અને દસ ચોગ્ગા સાથે 83 રન ફટકાર્યા હતા. આ ઉપરાંત પ્રેરક માંકડે બીજા સત્રમાં થોડી લડત આપીને 83 બોલમાં અણનમ 35 રન ફટકાર્યા હતા તો અર્પિત વસાવડાએ 25 રનનું યોગદાન આપ્યું હતું. શેલ્ડન જેક્સને પણ અડિખમ બેટિંગ કરી હતી.

ઓપન કેવીન જીવરાજાણી ત્રીજી જ ઓવરમાં ખાતુ ખોલાવ્યા વિના આઉટ થઈ ગયા બાદ જેક્સન અને દેસાઈએ મળીને સ્કોર બાવન સુધી પહોંચાડ્યો હતો. આ તબક્કે જેક્સન 41 બોલમાં 22 રન ફટકારીને આઉટ થયો હતો. સૌરાષ્ટ્રનો સૌથી અનુભવી અને આધારભૂત બેટ્સમેન ચેતેશ્વર પૂજારા આ સિઝનમાં શાનદાર ફોર્મ ધરાવે છે પરંતુ શુક્રવારે તે માત્ર બે રન કરી શક્યો હતો. તામિલનાડુ માટે કેપ્ટન સાઇ કિશોરે 66 રનમાં પાંચ વિકેટ ઝડપી હતી તો એસ. અજિત રામે ત્રણ અને ઝડપી બોલર સંદીપ વોરિયરે બે વિકેટ લીધી હતી. પ્રથમ દિવસની રમતને અંતે તામિલનાડુએ તેના પ્રથમ દાવમાં એક વિકેટે 23 રન કર્યા હતા. સૌરાષ્ટ્રના ચિરાગ જાનીએ ઓપનર વિમલ કુમારને બોલ્ડ કરીને ટીમને પહેલી સફળતા અપાવી હતી.