ભારત તેના મહત્વાકાંક્ષી સેમિકન્ડક્ટર ઉદ્યોગને આગળ વધારવાનું શરુ કર્યું

ત્રણ નવા સેમિકન્ડક્ટર પ્લાન્ટનો શિલાન્યાસ આગામી સપ્તાહે કરવામાં આવે તેવી શક્યતા!

(જી.એન.એસ),તા.૦૭

ટાટા જૂથના બે સહિત $15.14 બિલિયનના ત્રણ નવા સેમિકન્ડક્ટર પ્રોજેક્ટ્સ માટે આગામી સપ્તાહે અપેક્ષિત ગ્રાઉન્ડબ્રેકિંગ સમારોહ સાથે ભારત તેના મહત્વાકાંક્ષી સેમિકન્ડક્ટર ઉદ્યોગને આગળ વધારવાનું શરૂ કરી રહ્યું છે. વડાપ્રધાન નરેન્દ્ર મોદીના નેતૃત્વમાં આ ઐતિહાસિક પહેલ શરૂ કરવામાં આવી છે, જેના કારણે વૈશ્વિક સિલિકોન માર્કેટમાં ચીનનો દબદબો ડગમગવા લાગ્યો છે. તમને જણાવી દઈએ કે હાલમાં સેમિકન્ડક્ટર માર્કેટમાં ચીનનો દબદબો છે. હવે ભારત આ વર્ચસ્વ તોડી રહ્યું છે. ચીન પહેલેથી જ આર્થિક મંદીની ઝપેટમાં છે. હવે આ પગલાથી તેનું બેન્ડ બોલશે તે નિશ્ચિત માનવામાં આવે છે. કેન્દ્રીય કેબિનેટ દ્વારા મંજૂરી મળ્યા પછી ત્રણ ચિપ પ્લાન્ટનો શિલાન્યાસ બે અઠવાડિયાથી ઓછા સમયમાં કરવામાં આવે તેવી શક્યતા છે, જે 20,000 અદ્યતન તકનીકી નોકરીઓની સીધી રોજગારી અને લગભગ 60,000 પરોક્ષ નોકરીઓનું સર્જન કરવા માટે તૈયાર છે. નવા એકમો, જેમાં ગુજરાતના ધોલેરામાં તાઈવાનની પાવરચિપ સેમિકન્ડક્ટર મેન્યુફેક્ચરિંગ કોર્પ (PSMC) સાથે ટાટાના ફેબનો સમાવેશ થાય છે, ઉચ્ચ-પ્રદર્શન ચિપ્સ માટે દર મહિને 50,000 વેફર્સનું લક્ષ્ય રાખે છે. આસામમાં ટાટાનું એસેમ્બલી, ટેસ્ટ, મોનિટરિંગ અને પેકિંગ (ATMP) યુનિટ અદ્યતન પેકેજિંગ ટેક્નોલોજી માટે અને CG પાવરનું ગુજરાત યુનિટ રેનેસાસ ઇલેક્ટ્રોનિક્સ અને સ્ટાર્સ માઇક્રોઇલેક્ટ્રોનિક્સ સાથે નોંધપાત્ર રોકાણ અને વૈશ્વિક ભાગીદારી દ્વારા મજબૂત સેમિકન્ડક્ટર ઇકોસિસ્ટમનું નિર્માણ કરવા માટે ભારતની પ્રતિબદ્ધતા દર્શાવે છે.  ભારત પાસે પહેલેથી જ ચિપ ડિઝાઇનમાં ઊંડી ક્ષમતાઓ છે.

ઉદ્યોગ નિષ્ણાતો કહે છે કે આ એકમો સાથે દેશ ચિપ ઉત્પાદનમાં ક્ષમતા પણ વિકસાવશે, જે આગામી વર્ષોમાં ચીનનો બજાર હિસ્સો વધુ પડકારજનક બનાવશે. સેમિકન્ડક્ટર ઉદ્યોગમાં નવું રોકાણ ચીનથી દૂર જઈ રહ્યું છે અને ઇલેક્ટ્રોનિક્સ ઉત્પાદન “નજીકના ભવિષ્ય માટે એશિયામાં રહેશે. ગુજરાતમાં રૂ. 22,500 કરોડના માઈક્રોન સેમિકન્ડક્ટર પ્લાન્ટમાંથી પ્રથમ ભારત નિર્મિત ચિપ આ વર્ષે ડિસેમ્બરમાં આવવાની છે. માઇક્રોન પ્લાન્ટ ઉપરાંત, ટાટાના સેમિકન્ડક્ટર ફેબનું નિર્માણ તાઇવાનની PSMC સાથે રૂ. 91,000 કરોડના રોકાણથી કરવામાં આવશે. આ ફેબ ઇલેક્ટ્રિક વાહનો (EV), ટેલિકોમ, ડિફેન્સ, ઓટોમોટિવ, કન્ઝ્યુમર ઈલેક્ટ્રોનિક્સ, ડિસ્પ્લે, પાવર ઈલેક્ટ્રોનિક્સ વગેરે માટે 28 એનએમ ટેક્નોલોજી અને પાવર મેનેજમેન્ટ ચિપ્સ સાથે હાઈ-પરફોર્મન્સ કમ્પ્યુટ ચિપ્સને આવરી લેશે. ટાટા સેમિકન્ડક્ટર એસેમ્બલી અને ટેસ્ટ પ્રાઇવેટ લિમિટેડ (TSST) દ્વારા આસામના મોરીગાંવમાં રૂ. 27,000 કરોડના રોકાણ સાથે દરરોજ 48 મિલિયનની ક્ષમતા ધરાવતું ચિપ એસેમ્બલી, ટેસ્ટિંગ, મોનિટરિંગ અને પેકિંગ (ATMP) યુનિટ સ્થાપવામાં આવશે. સ્પેશિયાલિટી ચિપ્સ માટેનું ત્રીજું સેમિકન્ડક્ટર ATMP યુનિટ CG પાવર દ્વારા રેનેસાસ ઇલેક્ટ્રોનિક્સ કોર્પોરેશન, જાપાન અને સ્ટાર્સ માઇક્રોઇલેક્ટ્રોનિક્સ, થાઇલેન્ડ સાથેની ભાગીદારીમાં સાણંદ, ગુજરાત ખાતે સ્થાપવામાં આવશે, જેની ક્ષમતા દરરોજ 15 મિલિયન અને રૂ. 7,600 કરોડના રોકાણ સાથે છે. તાજેતરના સરકારી ડેટા અનુસાર, “મોબાઇલ ફોનની નિકાસ પણ 2014-15માં અંદાજિત રૂ. 1,566 કરોડથી વધીને 2022-23માં અંદાજિત રૂ. 90,000 કરોડ થઈ છે, જે નિકાસમાં 5,600 ટકાથી વધુની પ્રભાવશાળી વૃદ્ધિ તરફ દોરી જાય છે.”