પ્રભાસ શ્રીરામ બાદ હવે ફિલ્મ ‘કન્નપ્પા’માં ભગવાન મહાદેવની ભૂમિકામાં જોવા મળશે

(GNS),11

બાહુબલી ફિલ્મને મળેલી સફળતા બાદ પ્રભાસ દેશભરમાં જાણીતો ચહેરો બની ગયો છે. વર્તમાન સમયે તે પ્રોજેક્ટ કલ્કિ 2898 AD અને સાલારને લઈને ચર્ચામાં છે. થોડા મહિના પહેલાં આવેલી આદિપુરુષ ફિલ્મની ટીકાઓ થયા બાદ પણ પ્રભાસ પર ઘણા ચાહકોને વિશ્વાસ છે. તેની આગામી ફિલ્મો બાબતે ઘણી અપેક્ષાઓ સેવવામાં આવી રહી છે. આ દરમિયાન તેની વધુ એક ફિલ્મની જાહેરાત થઈ ચૂકી છે, જેમાં તે ભગવાન શિવની ભૂમિકામાં જોવા મળશે. ‘આદિપુરુષ’માં તેણે ભગવાન રામની ભૂમિકા ભજવી હતી. ત્યારે હવે આગામી ફિલ્મમાં તે ભગવાન શિવની ભૂમિકામાં જોવા મળવાનો હોવાના અહેવાલો સામે આવતા ચાહકોને ચિંતા છે કે, આ ફિલ્મની હાલત ક્યાંક આદિપુરુષ ફિલ્મ જેવી ન થાય. પ્રભાસની આ ફિલ્મનું નામ ‘કન્નપ્પા- અ ટ્રુ એપિક ઇન્ડિયન ટેઈલ’ છે. જેમાં તેલુગુ સ્ટાર વિષ્ણુ માંચુ પણ જોવા મળશે. રિપોર્ટમાં દાવો કરવામાં આવ્યો છે કે, આ ફિલ્મમાં કૃતિ સેનનની બહેન નૂપુર સેનન પણ જોવા મળશે.

ટ્રેડ એનાલિસ્ટ્સ અને ફિલ્મ ક્રિટિક્સ મનોબાલા વી અને રમેશ બાલાએ એક્સ (ટ્વિટર) પર આ પ્રોજેક્ટ અંગે માહિતી આપી છે. રમેશ બાલાએ પ્રભાસ અને વિષ્ણુ માંચુની તસવીર શેર કરી છે. તેમણે લખ્યું છે કે, “વિશ્વસનીય સૂત્રોના જણાવ્યા અનુસાર, ‘રીબેલ’ સ્ટાર પ્રભાસ આગામી સમયમાં વિષ્ણુ માંચુના ડ્રીમ પ્રોજેક્ટ ‘કન્નપ્પા – અ ટ્રુ એપિક ઇન્ડિયન ટેઈલ’માં મુખ્ય ભૂમિકા ભજવશે. વિષ્ણુ માંચુએ રમેશ બાલાની પોસ્ટને રીપોસ્ટ કરીને આ અહેવાલની પુષ્ટિ કરી હતી. તેમને કેપ્શન આપ્યું હતું કે, હર હર મહાદેવ, કન્નપ્પા. જો આ ફિલ્મ બનશે તો પ્રભાસ ત્રીજી વખત ભગવાનના રોલમાં જોવા મળશે. પ્રભાસે આદિપુરુષ ભગવાન રામની ભૂમિકા ભજવી હતી. તેની આગામી ફિલ્મ કલ્કિ 2898 ADમાં તેનો રોલ ભગવાન વિષ્ણુ પર આધારીત છે. હવે તે ભગવાન શિવના રોલમાં જોવા મળી શકે છે. ‘કન્નપ્પા- અ ટ્રુ એપિક ઇન્ડિયન ટેઈલ’ને મુકેશ કુમાર સિંહ ડાયરેક્ટ કરવાના છે. તેઓ મહાભારતમ ટીવી સીરીઝને ડાયરેક્ટ કરી ચૂક્યા છે. બીજી તરફ પ્રભાસ હવે કેજીએફના ડિરેક્ટર પ્રશાંત નીલ દિગ્દર્શિત “સાલાર”માં જોવા મળશે. આ ઉપરાંત ‘કલ્કી 2829 AD’માં તે લીડ રોલમાં જોવા મળશે. આ ફિલ્મમાં દીપિકા પાદુકોણ, અમિતાભ બચ્ચન, કમલ હાસન અને રાણા દગ્ગુબાતી પણ છે.