જમ્યા પછી પાન ખાવાનો ચસ્કો પડશે ભારે, જાણો કેટલી જોખમી છે મીઠી સોપારી

જી.એન.એસ, તા.૧૩ વડોદરા
જમ્યા પછી પાન ખાવાની આદત અને શોખ ધરાવતા લોકો શહેરના નાના-મોટા પાનના ગલ્લાઓ તો ઠીક પણ જાણીતા પાન પાર્લરો ઉપર પાન ખાતા પહેલાં વિચારજો. રાજકોટમાં આરોગ્ય વિભાગે પાન પાર્લરો ઉપર સપાટો બોલાવ્યા બાદ વડોદરા મહાનગર સેવા સદનના આરોગ્ય વિભાગે બુધવારે શહેરના જાણીતા પાન પાર્લરો ઉપર દરોડા પાડ્યા હતા. પાનમાં નાંખવાની અખાદ્ય ચટણી, ફૂગ ચઢેલી સોપારી, કાથો, ચૂનાના પાર્સલ સહિતના જથ્થાનો નાશ કર્યો હતો. પારસ અને અમર પાન હાઉસને નોટિસો આપી હતી. નોંધનીય છે કે, વડોદરા મહાનગર સેવા સદનના આરોગ્ય વિભાગ દ્વારા પ્રથમ વખત જ પાન પાર્લરો ઉપર દરોડા છે.
રાજકોટમાં આરોગ્ય વિભાગે પાન પાર્લરો ઉપર દરોડા પાડ્યા બાદ વડોદરા મહાનગર સેવા સદનનું આરોગ્ય વિભાગ સફાળુ જાગ્યું હતું. બુધવારે સાંજે આરોગ્ય વિભાગની બે ટીમોએ શહેરના સયાજીગંજ, અલકાપુરી, ફતેગંજ, જુના પાદરા રોડ સહિત શહેરના વિવિધ વિસ્તારોમાં આવેલા જાણીતા પારસ પાન હાઉસ, અમર પાન હાઉસ, રીચ પાન હાઉસ સહિત 15 જેટલા પાન પાર્લરો ઉપર દરોડા પાડ્યા હતા. આરોગ્ય વિભાગે દરોડા દરમિયાન પાનમાં નાંખવાની 28 કિલો ચટણી, 4 કિલો કાથાનો પાવડર, 1 કિલો મીઠી સોપારી અને 2 કિલો ચૂનાના પાર્સલ સહિત વિવિધ પાન-મસાલામાં નાંખવાનો અખાદ્ય સામાનનો નાશ કર્યો હતો.
આરોગ્ય વિભાગના ઇન્સ્પેક્ટરોએ જણાવ્યું હતું કે, પાનમાં નાંખવાની ચટણીની બરણી ઉપર ઉત્પાદન તારીખ લખેલી ન હતી. બેચ નંબર પણ લખ્યો ન હતો.તેમજ એક્સપાયરી ડેટની ચટણી મળી આવી હતી. આ ઉપરાંત ફૂગ ચઢેલી મીઠી સોપારી પાન પાર્લરો ઉપરથી મળી આવી હોવાથી વિવિધ ચીજવસ્તુઓનો નાશ કરવામાં આવ્યો હતો. આ સાથે પારસ પાન હાઉસ અને અમર પાન હાઉસના સંચાલકો પાસે લાયસન્સ માંગવામાં આવ્યું હતું. પરંતુ, માલિકો સ્થળ પર હાજર મળી આવ્યા ન હતા. તેમજ તેઓના પાન હાઉસમાંથી અખાદ્ય ચીજવસ્તુઓ મળી આવતા નોટિસ આપવામાં આવી હતી.