કલોલના વડસર ગામે સંકલ્પ યાત્રા રથનો ધારાસભ્ય શ્રી લક્ષ્મણજી ઠાકોરની ઉપસ્થિતિમાં ગામની દીકરીઓએ ઉષ્માભર્યું સ્વાગત કર્યું
જલ જીવન મિશન અંતર્ગત વડસર ગામને હર ઘર જલ પંચાયત તરીકેનું પ્રમાણપત્ર અર્પણ કરતા કલોલના ધારાસભ્યશ્રી
(જી.એન.એસ),તા.૦૧
ગાંધીનગર,
આંગળી ચિંધ્યાનું પુણ્ય કમાવાની તક વિકસિત ભારત સંકલ્પ યાત્રા થકી ગામના સેવાભાવી નાગરિકો અને યુવાનોને મળી રહ્યું છે, તેવું આજે વળસર ખાતે કલોલના ધારાસભ્ય શ્રી લક્ષ્મણજી ઠાકોરે જણાવ્યું હતું. કલોલ તાલુકાના વડસર ગામે વિકસિત ભારત સંકલ્પ યાત્રા રથનું પરંપરાગત ભારતીય પ્રણાલી મુજબ રથનું સ્વાગત કલોલના ધારાસભ્ય શ્રી લક્ષ્મણજી ઠાકોર અને મહાનુભાવોની ઉપસ્થિતિમાં ગામની દીકરીઓ દ્વારા કરવામાં આવ્યું હતું.
આ પ્રસંગે લક્ષ્મણજી ઠાકોરે જણાવ્યું હતું કે કલોલ તાલુકાના ૫૬ ગામોમાં વિકસિત ભારત સંકલ્પ યાત્રાનો રથ ફરશે. સરકારની ૧૭ જેટલી ફ્લેગશીપ યોજનાઓનો લાભ કેવી રીતે સરળતાથી મેળવી શકાય છે, તેની માહિતી પણ ગામના નાગરિકો અને યુવાનો અને લાભાર્થીઓને આપવામાં આવશે. ધારાસભ્યશ્રીએ ઉજ્વલા યોજના, જન ધન યોજના, પ્રધાનમંત્રી આયુષ્યમાન કાર્ડ યોજના જેવી વિવિધ 17 પ્રકારની યોજનાઓની વિસ્તૃત માહિતી પણ આપી હતી.
તેમણે ઉમેર્યું હતું કે, નાગરિકોના સર્વાંગી વિકાસને આ સરકારે પ્રાધાન્ય આપ્યું છે. આ યાત્રા થકી પદાધિકારીઓ અધિકારીઓ અને સેવાભાવી ગામના નાગરિકોને લોકોને મદદ કરવાના અને ઉપયોગી થવા માટેની એક ઉમદા તક પણ મળી રહી છે. તેમણે ઉમેર્યું હતું કે, કેન્દ્રીય ગૃહ અને સહકાર મંત્રી શ્રી અમિતભાઈ શાહે કલોલ તાલુકાના વિકાસને તેજ ગતિ આપી છે. વડસર ગામમાં તળાવના બ્યુટીફિકેશન માટે રૂપિયા ૫ કરોડની ફાળવણી કરવામાં આવી હતી. તેની સાથે વળસર ગામ સહિત કલોલ તાલુકાના ગામોમાં આરોગ્ય, શિક્ષણ અને જન સુખાકારીને પ્રાધાન્ય આપી તે દિશામાં સચોટ અને નક્કર રીતે કામગીરી કરવામાં આવી રહી છે.
આ પ્રસંગે શાળાના બાળકો દ્વારા ધરતી કરે પોકારનું નાટક રજુ કરવામાં આવ્યું હતું. તેમજ વિધવા પેન્શન યોજના, પ્રાકૃતિક ખેતી અને સોઇલ હેલ્થ કાર્ડ યોજનાનો લાભ મેળવનાર લાભાર્થીઓએ પોતાના મુખે યોજનાની વાત ગ્રામજનો સમક્ષ રજૂ કરી હતી. સરકારના વિવિધ વિભાગો દ્વારા પોતાના સ્ટોર ઉભા કરી ગ્રામજનોને વિવિધ યોજનાઓની માહિતી સાથે તેના લાભો આપવામાં આવ્યા હતા. તેમજ આરોગ્ય કેમ્પનું પણ આયોજન કરવામાં આવ્યું હતું.
ધારાસભ્યશ્રી અને મહાનુભાવોના હસ્તે ગામના સરપંચશ્રીને વડસર ગામ જળ જીવન મિશન અંતર્ગત હર ઘર જલ પંચાયતનું પ્રમાણપત્ર અને વિવિધ યોજનાઓના લાભાર્થીઓને તેમના લાભ અર્પણ કરવામાં આવ્યા હતા. વડસર ખાતે યોજાયેલ કાર્યક્રમમાં પશુપાલન અધિકારી શ્રી એસ.એચ.પટેલ જિલ્લા પંચાયતના પૂર્વ પ્રમુખ શ્રી રામાજી ઠાકોર, તાલુકા વિકાસ અધિકારી સહિત આમંત્રિત મહાનુભાવો અને ગ્રામજનો મોટી સંખ્યામાં ઉપસ્થિત રહ્યા હતા.
This content is restricted to site members. If you are an existing user, please log in. New users may register below.
