ભારતીય હવામાન વિભાગ (India Meteorological Department – IMD)એ મંગળવારે ચક્રવાતી તોફાનને લઈને એક મોટું અપડેટ આપ્યું છે. IMDએ કહ્યું છે કે 6 મેની આસપાસ દક્ષિણપૂર્વ બંગાળની ખાડીમાં ચક્રવાત સર્જાય તેવી શક્યતાઓ છે અને પરિણામે આગામી 48 કલાકમાં હવાનું દબાણ નીચું રહેવાની શક્યતાઓ છે. વર્ષ 2023નું પ્રથમ ચક્રવાતી તોફાન મે મહિનામાં આવવાની આગાહી કરવામાં આવી છે. IMD અનુસાર, 6 મેના રોજ બંગાળની ખાડી પર ચક્રવાત સર્જાવાની સંભાવના છે.
આ અંગે IMDના ડિરેક્ટર મૃત્યુંજય મહાપાત્રાએ કહ્યું, ‘કેટલીક સિસ્ટમોએ તેને ચક્રવાત હોવાની આગાહી કરી છે. અમે જોઈ રહ્યા છીએ. અપડેટ્સ નિયમિતપણે ઉપલબ્ધ કરવામાં આવશે.’ આગાહી પછી, ઓડિશાના મુખ્યમંત્રી નવીન પટનાયકે અધિકારીઓને તમામ રીતે તૈયાર રહેવા જણાવ્યું છે. આંતરરાષ્ટ્રીય હવામાનશાસ્ત્રીઓએ મેના બીજા સપ્તાહમાં ચક્રવાતી તોફાનની આગાહી કરી છે.
હવામાનશાસ્ત્રીઓએ કહ્યું છે કે, આ સપ્તાહના અંત સુધીમાં દક્ષિણ બંગાળની ખાડી પર નીચા દબાણનું ક્ષેત્ર બની શકે છે. વૈજ્ઞાનિકોએ કહ્યું છે કે લો પ્રેશર ચક્રવાતી તોફાનનું રૂપ ધારણ કરે તેવી પ્રબળ સંભાવના છે. આ ચક્રવાતની અસર પૂર્વ ભારતથી બાંગ્લાદેશ અને મ્યાનમાર સુધી લંબાય તેવી શક્યતા છે.
જો સત્તાવર રીતે તેની પુષ્ટિ થાય તો વિશ્વ હવામાન સંસ્થા (WMO) અને યુનાઈટેડ નેશન્સ ઈકોનોમિક એન્ડ સોશિયલ કમિશન ફોર એશિયા એન્ડ ધ પેસિફિક (ESCAP) દ્વારા અપનાવવામાં આવેલી નામકરણ પદ્ધતિ હેઠળ ચક્રવાતનું નામ ‘મોચા’ રાખવામાં આવશે.’ (Mocha) હશે. યમને આ ચક્રવાતનું નામ લાલ સમુદ્રના કિનારે આવેલા બંદર શહેર ‘મોચા’ના નામ પરથી સૂચવ્યું હતું.
ઓડિશાના મુખ્યમંત્રી નવીન પટનાયકે મંગળવારે ચક્રવાતનો સામનો કરવા માટેની તૈયારીઓની સમીક્ષા કરવા માટે એક ઉચ્ચ-સ્તરીય બેઠકની અધ્યક્ષતા કરી અને અધિકારીઓને ચક્રવાત અંગે IMDની આગાહીને પગલે તમામ પ્રકારની ઘટના માટે તૈયાર રહેવા જણાવ્યું છે. આ સિવાય હવામાન વિભાગ દ્વારા પણ ચક્રવાતની ઘટના પર સતત નજર રાખવામાં આવી છે.
ગુજરાતના હવામાનમાં સતત પલટો આવી રહ્યો છે અને એવી પણ શક્યતાઓ છે કે બંગાળની ખાડીમાં ઉભા થનારા ચક્રવાતની અસર પણ રાજ્ય પર પડી શકે છે. હાલ ગુજરાતમાં વેસ્ટર્ન ડિસ્ટર્બન્સના કારણે સતત પાછલા કેટલાક સમયથી વરસાદ થઈ રહ્યો છે અને આગામી દિવસોમાં પણ વરસાદ રહેવાની આગાહી સ્થાનિક હવામાન વિભાગ દ્વારા કરવામાં આવી છે.
This content is restricted to site members. If you are an existing user, please log in. New users may register below.
