અમદાવાદના વસ્ત્રાલ નિરાંત ચોકડી પાસે ૩ રાઉન્ડ ફાયરિંગ, યુવક ગંભીર રીતે ઈજાગ્રસ્ત

(જી.એન.એસ), તા.૧
અમદાવાદના પૂર્વ વિસ્તારમાં વસ્ત્રાલ નિરાંત ચોકડી સુમીત સોસાયટી નજીક મોડી સાંજે ગૌતમ સીંઘવ ઉપર મોટર સાઈકલ ઉપર આવેલા બે અજાણ્યા હેલ્મેટ પહેરેલ શખ્સો ત્રણ રાઉન્ડ ફાયરીંગ કરીને આંખના પલકારામાં ફરાર થઈ ગયા હતા. ગંભીર રીતે ઘાયલ ગૌતમ સીંઘવ દરબારને સારવાર માટે એલજી હોસ્પિટલમાં ખસેડવામાં આવ્યો છે. પોલીસને ઘટનાની જાણ થતા ઉચ્ચ પોલીસ અધિકારીઓ હોસ્પિટલમાં પહોંચી ગયા છે. શુક્રવારે રાત્રે પોલીસે અજાણ્યા બાઈક સવાર સામે ગુનો દાખલ કર્યા છે. ફાયરિંગની ઘટનાથી વિસ્તારમાં નાસભાગ ફેલાઈ ગઈ હતી.
વસ્ત્રાલ નિરાંત ચોકડી પાસે આવેલી સુમીત સોસાયટી પાસે મોડી સાંજે ગૌતમ સીંઘવ ઉભો હતો ત્યારે હેલ્મેટ પહેરલ બાઈક ઉપર આવેલા બે શખ્સો અચાનક ગૌતમ પાસે ઘસી જઈને ફાયરિંગ કરતા ગૌતમના પેટના ભાગે ગંભીર ઈજાઓ પહોંચી હતી. બીજી તરફ બાઈક ઉપર આવેલા બે શખ્સો ત્યાથી રફુચક્કર થઈ ગયા હતા. પેટ અને ગળાના ભાગે ગંભીર રીતે ઘાયલ ગૌતમને સારવાર માટે એલજી હોસ્પિટલમાં દાખલ કર્યો છે. ઉચ્ચ પોલીસ અધિકારીઓ એલજી હોસ્પિટલમાં દોડી ગયા હતા.મોડી રાત્રે પોલીસે વસ્ત્રાલ નિરાંત ચોકડી પાસેના સીસીટીવી ફુટેજની તપાસ હાથ ધરી હતી. ફાયરિંગની ઘટનાને લઈ મોડી રાતે વસ્ત્રાલ વિસ્તારમાં લોકોમાં દોડધામ મચી જવા પામી હતી. જો કે, હજુ કોઈ હૂમલાખોર ઝડપાયો નથી.